Nongpoh, Risaw 06: Naduh u MLA u Bah Mayral Born Syiem bad ka MDC ka Kong Rona Khymdeit kum ki nongmihkhmat na ka Nongpoh Constituency mynta ka sngi ki la leit ban plie paidbah ia kawei na ka kynhun ki nongrep ba la tip kum ka Marmain Circle Freshwater Fisheries Multipurpose Co-operative Society Limited, ha kaba lah ban sngewthuh lyngba kane ka kynhun ki thmu ban kyntiew ia ka kam ri dohkha ban kyntiew ia ka ioh ka kot jong ki nongrep hapoh ka thaiñ jong ka shnong Marmain ha Ri Bhoi District.

Ha kane ka jingplie ia kane ka kynja society, nalor u Ba Mayral Born Syiem kum u MLA bad ka Kong Rona Khymdeit kum ka MDC, kiwei kiwei kiba la ia don lang ki kynthup ia u Block Development Officer ka Umling C&RD Block u Bah Eric K Dkar, ki nongialam shnong, ki nongialam katei ka kynhun bad ki nongshong shnong katei ka thaiñ.

Ha kane ka Society ki don haduh 16 tylli ki shnong kiba iatrei lang hapoh ka Society bad ki hap ban peit ban khmih haduh 400 tylli ki pung dohkha, ha kaba ka thong ka long ban ban pyndonkam da ki buit treikam thymmai ban ri dohkha na ka bynta ban kyntiew ia ka ioh ka kot ki nongrep ha kitei ki shnong.

Haba kren ha kane ka sngi, naduh u Bah Mayral Born Syiem kum u MLA bad ka Kong Rona Khymdeit kum ka MDC, ki la ai khublei ia kane ka Marmain Circle Freshwater Fisheries Cooperative Society ba la lah ban plie paidbah noh mynta ka sngi bad ki khmih lynti ruh ba lyngba kane ka kynhun ki nongrep kin lah shisha ban pynurlong ia ka jingangnud na ka bynta ban ri dohkha kiba dei katkum ka juk stad ba  mynta, khnang ba ki nongshong shnong katei ka thain kin  lah ban im jakpoh lyngba ka kam ri dohkha.

Shuh shuh, ki la pynpaw ruh ban iaid shaphrang kane ka Society, kum ki nongialam bad ki dkhot ka Society ki donkam ban don ka jingiatrei lang bad ka jingiasngewthuh jingmut, namar haba don lang kawei ka thong kin lah shisha ban poi sha kata ka thong kaba ki angnud ban kyntiew ia kane ka kam ri Dohkha, kaba long shisha ka jingmyntoi jong ki nongrep ha kitei ki shnong Nongkyndong bad khappud.