Nongpoh, Risaw 10: Da ki hajar ngut ki paidbah mynta ka sngi la tuid sha ka jingleh burom ba khatduh ia ka met ba dang sah jong u Kynsaihunlang Nengnong, uba dei u General Secretary ka RBYF Sengkmie ba la pynlong ha ka ïingsah jong u ha Umroi Madan.

Ki nongialam ka RBYF naduh u President ba rangbah ka seng u Bah Bipul Thangkhiew lem bad ki nongialam na ka seng kmie, ki zone, ki Circle bad ki Unit ki la shim bynta lang ban leh burom khatduh ia une u nongialam ha ryngkat ki ummat bad ki jingleh burom da ki syntiew ki skut.

Ha kane ka jingleh niam ba khatduh ia u Bah Kynsaihunlang Nengnong la shim bynta naduh ka ing ka sem, ki shnong ki thaw, ki nongialam bapher bapher ki seng bhalang, ki riew rangbah bad ki lok ki jor  bad bun na ki kim lah khlem da jaw ummat haba pynpaw halor ka jingiaid lynti jong une u nongialam uba la noh synniang shibun ia ka shnog ka thaw bad ia ka imlang ka sahlang.

Ia ka jinglehniam ba khatduh la pyniaid da u Rev. V. Trang uba dei u pastor incharge ka Mawbuh Pastorate bad ha ryngkat ka jingleh niam leh rukom naduh na la ïing tad haduh u lum jingtep ka Dorbar Umroi Pyllun.

Kum ban pynkynmaw, u Bah Kynsaihunlang Nengnong, uba dei u Secretary ka RBYF sengkmie u la khlad noh ha ka 8 tarik u Risaw 2025, kaba dei hadien ka jingshitom kaba la ban kynsan ia u bad kane ka jngkhlad kynsan jong u, ka la pyniam briew shisha ym tang ia ka ïing ka sem, ki khun ki kti bad ka shnong ka thaw, hynrei ia ka seng RBYF kaba la duh noh ia une u nongialam uba ka seng ka khmih lynti ba un dang kiew shaphrang ha ka kyrdan nongialam.

Ha kane ka sngi, nalor ki jingkren bapher bapher naduh ki nongialam shnong, ki nongialam ka Dorbar Umroi Pyllun bad ki nongialam seng bhalang bad kynthup ruh ia u Bah Bipul Thangkhiew kum u President, ki la ai kata ka jingkren kaba pynpaw shisha ia kata ka jingduhnong halor ka jingkhlad noh une u nongialam.

Shuh shuh, u President ba rangbah ka RBYF u Bah Bipul Thangkhiew, u la iathuh ba u Bah Kynsaihunlang Nengnong, u dei u samla uba don kata ka kyrdan nongialam, ha kaba na ka Unit kaba u bat nongialam ka la pynpoi ia u sha ka kyrdan General Secretary ka seng kmie, kaba dei halor ka jinglah jong u ban shim shisha ia kata ka kyrdan nongialam.