Mairang, Risaw 10: U Bah Sosthenes Sohtun, Myntri ka sorkar jylla, uba dei peit ia ka C&RD, mynta ka sngi, u la hiar sha ka shnong Bynther Eastern West Khasi Hills bad kata ka long ban leit iashimbynta ia ka jingsdang ka Bynther Secondary School, ban rakhe ia ka jingdap ba 50 snem ne ka Jingrakhe Jubilee Ksiar jong katei ka skul kaba la seng ha u snem 1976 bad pynkut pat ia katei ka jingrakhe ha u snem 2026.
Ha katei ka sngi, ba u Myntri Sorkar u la hiar sha katei ka shnong, la sakhi ruh da ka jingdon u Bah Shakliar Warjri, MLA Mawthadraishan, u Bah Equator Nongrang, MDC Mairang, u Bah Powell Sohklet, MDC Mawthadraishan, Ka Kong Anita Kharpor, Deputy Commissioner ka Eastern West khasi Hills District, ki ophisar sorkar, ki nongpyniaid ka skul, ki nonghikai, ki riew rangbah, ki khynnah skul lem bad kiwei.
Ia ka jingplie ban sdang ka jingrakhe dap 50 snem ia katei ka skul, la pynlong ha phyllaw jong katei bad ha katei ka sngi, u Bah Sosthenes Sohtun, kum u Kongsan u la pynher ia ka Lama ka skul, kaba long kum ka dak jong ka jingsdang ka jingrakhe, ha kajuh ruh ka por, u la plie ia u motdur sahkynmaw jong u Bah Bhatiarsing Syiem (Bam Kwai ha Dwai u Blei) uba dei u nongseng ia katei ka skul.
Kum ban shu kdew hangne, ba ka Bynther Secondary School, ka la long kum kawei na ki shlem ai jingnang jingstad ym tang ia ki khynnah hapoh katei ka shnong, hynrei wat ia ki shnong ba marjan ruh kumjuh.
Haba kren ha katei ka sngi, u Bah Sosthenes Sohtun, u la ai jingiaroh ia ki nongpyniaid lem bad ia ki nonghikai ha katei ka skul, namar ha kine ki 50 snem kiba la leit, ki la lenlade bad ieng skhem ha ka ban pyntyllun ia ia ka skul bad ruh ban ai jinghikai sha ki khynnah skul.
Lyngba jong katei ka sngi, u Bah Sosthenes Sohtun, u la kyntu ruh khynnah skul bad khamtam eh kiba kiba pule ia ka klas 10, ba kin long kiba trei shitom, khnang ba kin poi ha ki Top Position bad ioh ruh ia ka Percentage kaba bha tam, khnang ba ka jingpynkut ia ka jingrakhe dap 50 snem ha u 2026, kan long kaba shongkun bad ka ban sah jingkynmaw.
Nalorkata, u la kyntu ruh ia ki khynnah kiba pule ha katei ka skul, ba kim dei ban pynsngew ialade ba ki long ki khynnah nongkyndong bad khlem ka skul kaba biang, hynrei ki dei ban long kiba trei shitom bad minot, khnang ba kin ioh ban kheit ia u soh ka jingjop, u la bynrap.