Nongpoh, Risaw 11: Hadien ba mih ka huri hura haka shnong Nongthymmai 15 mer Byrnihat bad ki nongshong shnong ka Rangsakuna namar ka jing shah thap jong u Rangbah shnong  ka Nongthymmai 15 u Bah Elin Suting ha u wei u Rangbah Garo u ba la tip kyrteng kum u John R. Marak, halor kane kaba la mih ruh ka jingklumar kaba la jur bha bad kaba la poi shaduh u pud ba ki paidbah ki tur sha thanat ban dawa kem bad pynshitom ia u John Marak.

Halor kane ka jingjia, Ka Dorbar shnong jong ka Nongthymmai 15  mer ki la pyntip sha u President ka Synjuk ki Rangbah Shnong Ri Bhoi District u Bah B.B .Makdoh ha kaba hynnin ka sngi u la poi sha Byrnihat Outpost ha ryngkat ka jingsakhi lang da u Myntri Langstieh bad ki Basan jong ka Hima Mylliem ,ban sngap iaka jing shisha baroh bad hadien ka jingiakren na ka liang u John R  Marak unla Kubur iala ka jing bakla bad u la ong ba u kloi ban panmap ha khmat ki paidbah, kaba la pynlong iaki paidbah Nongshong shnong jong ka Nongthymmai 15 mer ba kin long kiba kloi ban iasuk noh bad u.

Kum ban pynkynmaw, kane ka jingjia ka la jia ha ka 9 tarik u Risaw 2025, ha kaba tang na ki daw ka jingpynbeit jaka, u Rangbah Shnong ka Shnong Nongthymmai 15mer u la shah thap ha u John R. Marak kaba la pynbitar ia ki paidbah nongshong shnong ba kin ia tur sha ka Thanad haduh ba la m ih ka huri hura bad ka jingiapyrshah halor kane ka jingshah thap u Rangbah Shnong.

U President ka Synjuk ki Rangbah shnong Ri Bhoi District u Bah B.B Makdoh u la ai da kaba tyngeh bad maham ruh ruh ba ym dei ban don shuh ban don kum kine ki jingjrong kti iaki nongialam shnong lane ban kren bein kren khoh iaka jait ki Khasi.  U President u la ong ruh ba ka Hima Mylliem ka donkam ban lum iaka dorbar shisien shisnem hapoh Ri Bhoi ban lum ban lang ia baroh ki khun ki hajar bad ban kham suk haka rukom shynshar khaddar shnong.

Naka liang u Bah Elin Suting ruh u la pdiang iaka jingpanmap paidbah jong u John Marak ,bad u la kyntu ruh iaki paidbah ba kim dei ban shuh ban dang ia buh shun buh khoh bad ki dei ban ia leit ia wan ne ia kren ia khana na ka bynta ban wan rah biang ia ka shongsuk shongsain hapdeng ki Khasi bad ki paid Garo ha katei ka thain Byrnihat.