Nongpoh, Risaw 14: Ki katto katne ki longiing ha ka shnong Pahamlang 17mer ha ka thain Byrnihat ha Ri Bhoi bad kiba la kylla long kum ki lanot shlei um, ki la kyrpad ia ka sorkar, ia u nongmihkhmat bad ia u trai ka jaka ba la pynieng ia ka Weighbridge, ba kin iarap ha ka ban pynioh ia ki lad jingiarap sha ki, namar ba ki la shah ktah eh na ka jingshlei um.

Haba kren sha ki lad pathaikhubor, ki katto katne ki longkmie na katei ka shnong bad ba ki iing ki sem jong ki, ki la shah ktah na ka jingshlei um, ki la ong ba ka dawbah jong katei ka jingshlei um, ka dei namar ba ka nala ban tuid ka um, ka la rit eh bad kata ka dei hadien ba ha ki bynta ban kham sharum jong katei ka shnong, la ieng kawei ka Weigh Bridge bad kaba la kynnoh kah noh ia ka lynti ban iaid ka um, kaba la wanrah pat ia ka jingshlei um ha ki iing ki sem.

Shuh shuh, ki la ong ruh ba shisien ba la hap slap, kaba mut ba ki iing ki sem hapoh katei ka shong, kin la ngat beit ha ka jingshlei um, kaba la wanrah ia ka jingjynjar bad sohsat eh ia kito ki longiing kiba ngat ha ka jingshlei um.

Kumta halor katei ka jingshlei um hapoh katei ka shnong bad kaba la ktah eh ia ki longiing, na ka liang kitei ki longkmie, ki la kyntu ia ka sorkar, ia u nongmihkhmat paidbah bad ruh ia trai jong katei ka jaka ba la pynieng ia ka Weighbridge, ba kin pynioh ia ki lad jingiarap na bynta ki longiing kiba la shah ktah eh ha ka jingshlei um.

Ha kajuh ruh ka por, ki la kyntu ia u trai jong katei ka jaka, ba un pynstet ia jingshna ia ka nala ban iaid ka um, khnang ba kan wengnoh ia ka jingjia shlei um hapoh katei ka shnong bad kaba la pynsohsat shikatdei eh ia ki paidbah