Nongpoh, Risaw 14: Ka All Jirang Youth Social Organisation(AJYSO), ka la pynlong ia ka lympung ialehkai phutbol ki khynnah kiba hapoh 16 snem ha madan New Jirang, kaba long ruh kum shibynta ban sah jingkynmaw ia u Pa’iem Lokendro Syiem, uba dei u Syiem ka Hima Jirang bad uba la synshar haduh 50 snem ia ka Hima Jirang, nalorkata u dei ruh u Syiem uba la slem eh ia katei ka Hima.

Nalor kaba pynsahkynmaw burom ia utei Lokendro Syiem, hynrei ka jingpynlong ka AJYSO, ia katei ka lympung ialehkai, ka long ruh kum shibynta ban kyntiew ia ka sap ka phong jong ki heprit, kiba dang biang ka rta bad kin sei madan ia ka sap ka phong kaba ki don ha ki kam ialehkai phutbol.

Kiba la donlang ha katei ka sngi, ki kynthup ia u Samla Remington Sankli, Secretary ka NPYF Western Jirang kum u kongsan, u Bah Sombarmoon Wahlang Dy. Syiem ka Hima Jirang kum u symbud kongsan, u Starshine Thangkhiew, President ka AJSYO, u Bah Rikynsai W. Nonghyndah, Sordar Shnong Umsohpanan lem bad kiwei.

Haba sdang jong katei ka lympung ialehkai, ka jingiakhun ka la long hapdeng ka Wahsynon-B pyrshah ia ka Nongthymmai, ha kaba ki heprit na ka Nongthymmai Sport Club, ki la lah ban pynliem noh ia ka Wahsynon-B da 6-0.