Nongpoh, Risaw 15: Tang hapoh ka 4 kynta ba ki Pulit ka Ri Bhoi ki la pynlong ia ka jingkhynra ia ki Kali ba pynkheiñ ain kiba iaid na ka surokbah National Highway-6 ha Ri Bhoi, ki la ioh ruh ban daiñ kuna haduh T. 4 lak na ki Kali ba pynkhein aiñ.

Kane ka jingtalasi ne khynra ia ki Kali ba pynkheiñ ain la pynlong ha Mawdiangum ba hap ha ka surokbah National Highway-6 ha Ri Bhoi hynnin ka miet ha kaba la sdang naduh ka por 9 baje mynmiet bad pynkut noh ha ka por 1 baje mynstep bad ha kane ka jingkhynra ia ki Kali la lap ba bun ki Kali ki la pynkhein ain da kaba dih buaid, khlem don ki kot ki sla, ki bym deng helmet bad pyndonkam ia ki light kali ba la khang ka sorkar bad kiwei kiwei ki jngpynkhein ain.

Ha kane ka jingkhynra ia ki Kali la ialam hi da u Senior Superintendent of Police ka Ri Bhoi u VS Rathore bad la don lang ruh u Additional SP u Bah O. Massar, ki heh pulit bad kiwei kiwei ki pulit, kiba la bat naphang ia ki Kali bad khlem da pynlait ia baroh ki Kali kiba pynkhein ain.

Kumba la sakhi bad lap ha kane ka jingkhynra kali, kiba bun hi na kiba shah dain kuna ba la kot sha ka T. 4 lak tang hapoh ka 4 kynta, ki dei ki jingioh dain kuna na ki Dribar ba dih buaid bad nalor kiwie kiwei kiba pynkhein ain.