Nongpoh, Risaw 30: Ban dang pynsngewthuh sha ki paidbah lyngba ki jingpyni nuksa (experiment) halor ka jingshngaiñ ban iaid ki Kali paidbah ka surokbah National Highway-6 ha Ri Bhoi, ka tnad Pulit Ri Bhoi mynta ka sngi ka la pyni syndon da ki jingpyni nuksa kum dei ban iaid ki Kali ha kane ka surokbah khnangba kan nym wan rah ka jingiatyngkhun kali ne ki jingjia ba sngewsih kaba la ju jia na ka por sha ka por ha kane ka surokbah.
Ia kane ka jingpyni nuksa naduh ki Kali heh haduh ki Kali rit ban iaid ha kane ka surokbah la pynglong ha Umsing By-pass, ha kaba ha ka jingialam Additional Superintendent of Police u Bah Orville Massar, ki ophisar lem bad ki pulit ki la pyni syndon da ka nuksa ia ki Trok Dribar bad ruh ki dribar jong ki Kali rit ba ki hap ban bud ia ki kyndon ban iaid ha kane ka surokbah khnang ban iada na ka jingjia ba sngewsih bad ki jingiatyngkhuh kali.
Kum ban pynkynmaw, kane ka jingbteng ki Pulit ban pyni ruh da ka kam ne ka nuksa, ka dei shi bynt ban ia khun pyrshah ia ki Kali ba pynkheiñ ain ba la ju wan jia ki jingjia ba sngewsih bad ki jingiatyngkhu kali bad kumba long mynta ki Pulit ka Ri Bhoi ki pyrkhing bha ban iaid beit iaid ryntih ki kali paidbah bad ruh ban nym don kano kano ka jingpynthud ia ka leit ka wan ki paidbah lyngba kane ka surokbah.
Haba ia kren sha ki lad pathai khubor, u Senior Superintendent of Police ka Ri Bhoi u VS Rathore, u la ong ba kane ka jingpynlong ban pyni syndon da ki nuksa ia ki dribar ba iaid ha ka surokbah, ka dei shi bynta ban hikai ba kin dup tip ha kano ka bynta ba ki hap ban iaid khnang ban nym mih ki jingiatyngkhuh kali ne kiba wan rah ruh ia ka jngjia ba sngewsih tang namar ba kim tip ban iaid ha kane ka surok ba dei ban iaid ha kane ka surokbah.
U la ong ruh ha kane jingpyni nuksa la pyniaid ia ki Kali nyngkong ha ka liang ka diang jong ka surok bad nangta sa pyniaid ha ka liang ka mon bad ruh sa pyniaid kyllain ia ki kali bad hadien kata sa kylli ia ki dribar kano ka bynta kaba ki sngew shngain ban iaid ki Kali.
“Kane baroh ka dei ka jingpynsngewthuh ia ki dribar ba nangne shakhamt ki hap ba tip ia ka lynti haba iaid lyngba ka surokbah ba ki hap ban bud thik pa thik ia ki kyndon, namar bunsien tang na ka daw ka jingbym tip ia ki kyndon ka ju wan rah ka jingjia ba sngewsih bad ka jingiatyngkhuh kali kaba ktah hi ia ki paidbah” ong utei u heh pulit.
