Shillong, Jylliew 17: Ki paidbah nongshong shnong jong ka Shnong Nongumkap kaba don ha West Khasi Hills bad markhap bad ka East Garo Hills District, hajan ka wah Ryndi ki la hap ban kynduh mawsiang ha ka leit ka wan, kaba dei hadien na ka daw ka jingjur slap ka umsaw ka la pynjulor ia ka Jingkieng Dieng ba la shna hi da ki paidbah na ka bynta ka leit ka wan ba ka jingkieng ka la shah rong noh ha ka um jong ka wah Ryndi.
Hadien ka jingrong noh ka um ia katei ka jingkieng, ki paidbah nongleit nongwan ki la mad ia ka jingjynjar ban leit sha iew sha hat kaba ki hap ban pyndonkam lada ki leit sha East Garo Hills.
Kumba la pynpaw, katei ka Shnong Nongumkap ka dei ruh ka shnong kaba dang sahdien ha ki kam pynroi bad haduh kine ki sngi ki paidbah kim don tang ka surok kaba bit ba biang lait noh na ka surok khyndew kaba ki la shna lyngba ka skhim MGNREGS khamtam ha kum kane ka por lyiur ki paidbah ki mad jingeh shisha ha ka leit ka wan na ka jingsniew ka surok.
Halor kane ka jingeh kitei ki paidbah lyngba ka jingrong noh ka um ia ka jingkieng bad ka jingsahdien ha ki kam pynroi, ki nongïalam shnong lyngba u sordar u Bah Jeremiia Dkhar bad u General Secretary u Bah Samson K. Bani lem bad ki paidbah nongshong shnong Nongumkap ki la kyrpad jur na u MLA bad MDC ka thain bad kumjuh ruh ia ka sorkar jylla ban kham phai khmat lem sha katei ka thaiñ na ka bynta ban pynioh ia ka jingkieng Wah-Ryndi bad ruh ban pynpoi ia ka surok khnang ban pynsuk ia ki paidbah katei ka thaiñ ha ka leit ka wan kumba ka surok ka long u budlum jong ka ioh ka koit ki paidbah.
RONG KA UMSAW IA KA JINGKIENG HA NONGUMKAP, SYRTOK KI PAIDBAH BA LEIT BA WAN
