MIH SA U KHÑIANG JINGPANG BA BAM ÏAKA DOH HAKA MET BRIEW HA JAPAN

Sa uwei pat u khñiang jingpang bala tip kum u Streptococcal Toxic Shock Syndrome (STSS) u ba bam ïaka doh briew u la mih pyrthei haka ri Japan hadien u khñiang jingpang Covid-19, bad katei ka jingpang ka lah ruh ban pynïap ïa u briew tang hapoh 48 kynta hadien ba ioh ïa utei u khñiang.
Katkum ka jinglum jingtip jong ka Japan’s National Institute of Infectious Disease, ka ri Japan kala don kumba 1000 ngut kiba la ioh ïa u tei u khñiang jingpang.
Utei u khñiang jingpang STSS u dei bala pynlong da ki khñiang Group A Streptococcus (GAS) bad kitei ki khñiang ki pynmih ïaka bih kaba lah ban ktah ïaka met bad wanrah ka jingpang ka jingktha bad ka jingkyndit,bad tang hadien ba kitei ki khñiang kila ioh ban rung sha ka met, kan pynlong ruh ïaki dkhot met ban sangeh treikam tang katto katne por.
Ki dak ki shin jong katei ka jingpang ki kynthup ïaka jingshit met, ka jingpang ki dohksah, kynroi prie bad thud haka rukom ïaid ka snam haka met kaba lah ruh ban pynlong ïa u briew ban at naka jingsangeh treikam ki dkhot met.
Naka liang ka US Centers for Disease Control and Prevention, kala ong ba watla katei ka jingpang ka long kaba shyrkhei naka 10 ngut kiba shah sumar, kumba 3 ngut ki lah ban khlad.
Lah ong ruh ba katei ka jingpang ka lah ban saphriang sha ki ri ka pyrthei lyngba ka leit ka wan jong ki paidbah bad ban ïada na katei ka jingpang ki paidbah ki donkam ban lehkhuid da kaba sait ïaki kti, ban sumar haki jaka ba don ka jingmong haka sniehdoh, bad lada don kano kano ka jingpang kaba kynsan, ka jingkhluid bad ka jingsaw haki jaka ba mong dei ban leit mar mar sha ki jaka sumar.