Shillong, Jylliew 17:
Ka long ka burom bad ka jingsarong kaba khraw ym tang ia ka East Jaintia Hills District bad jingsarong ruh ka long ia ka jylla Meghalaya hi baroh kawei, ha kaba ka Samla Batbitbha Bareh na East Jaintia Hills District ka la long ka kynthei kaba nyngkong eh na ka jylla ban ioh bat ia kata ka kyrdan ba la tip kum ka National Level Referee (Level 5) jong ka jylla Meghalaya.
Kane ka jingioh nam bad ka jingioh kyrdan katei ka samla ha katei ka kyrdan National Level Referee (Level 5) ka la paw pyrthei, ka dei hadien ba ha ka shithi ba la phah sha u General Secretary ka Meghalaya Football Association, ka All India Football Federation (AIFF) lyngba ka Director jongka States Referees, la pynbna ba ka samla Batbitbha Bareh ka la lah ban pyndep ia ki saw tylli ki bynta lyngba ka National Examinations (Level 5) jong u snem 2024 ba kynthup ha ka ktien nongwei kum ka Fitness, Theory, Practical bad ka Viva Examination.
Kum ban pynpaw lang, ka Bulmi Phawa na ka West Jaintia District Sport Association ruh ka la lah ban pyndep ia ka eksam na ka bynta jong ka thain Shatei Lam Mihngi jong u snem 2023.
La pynpaw ruh ba ka Batbitbha Bareh ka la pyndep ruh ia ka diploma course ha ka lain sports coaching ha ka jingialehkai phubtol na SAI Netaji Subhas Eastern Centre, Kolkata ha u u snem 2019.
Halor kane ka jingjop ba la wan rah nam wan rah burom da ka samla Batbitbha Bareh, ka East Jaintia Hills District Football Association (EJHDFA) bad ka West Jaintia District Sports Association (WIDSA) ki la ai ka jingkhublei kaba kyrpang ia kine ki ar ngut ki samla bad ki kitbok kitrwiang ruh ba kin dang kiew shaphrang ha baroh ki liang jong ka jingiaid lynti ka jingim kaba long ka burom ia ka dong bad ka thaiñ bad kumjuh ruh ia ka jylla Meghalaya hi baroh kawei.
