Nongpoh, Naiwieng 02: Kumba ba ka pyrthei ka ju rakhe man la u snem ha ka 2 tarik u Naiwieng ban kynmaw burom ia ki mynsiem kiba la khlad noh ne ba la tip paidbah ha ka pyrthei kum ka ‘All Soul’s Day’, ka Nongpoh Parish ruh mynta ka sngi ka rakhe kyrpang ia kane ka sngi mynta ka sngi ha u Lum Jingtep ka Balang Katholik kaba don ha Mawroh Nongpoh.

Ha kane ka jingrakhe ki paid riewngeit bad ki ba haïing hasem jong kito kiba la khlad noh ki la ia lum lang ha utei u lum jingtep na ka bynta ban buh syntiew bad ruh ban duwai kyrpang na ka bynta kito ki mynsiem kiba la khlad noh ba kin ioh ia kata ka mynsiem jong ka jingjahthaid kaba bym jut kut.

Ha kane ka jingkynmaw burom ia ki mynsiem ba la khlad noh la pynlong da ka Mass bakhuid ha utei u lum kyntang, hakaba u Fr. Raphael Ristarnland Maiong u la shim ia ka bynta ba kongsan ban kyrkhu ia u lum jingtep bad ruh ban pyndep ia ka niam ka rukom ha ka mass bakhuid na ka bynta kito ki mynsiem ba la khlad noh.

Hadien ka jinglehniam na ka bynta ki mynsiem la khlad noh, kiba haïing hasem ki la buh jingduwai kyrpang ryngkat ban leh burom da ki syntiew ki skut bad ruh ban thang ia ki mombati kum ka dak ka jingduwa kyrpang ia ki mynsiem jong kiba ieit ba thoin ba kin ioh ia kata ka jingmap bad khamtam ban ioh ia kata ka jingjahthaid kaba bym ju kut ha ka khet ka jong u Blei, kaba dei kawei na ka tyllong jingngeit ka Balang Katholik ba kito kiba la khlad ki donkam ruh ia ka jingiasaid lyngba ki jingduwai.