Ka kynhun ïalehkai kriket ki kynthei jong ka ri India kila lah ban pynliem lyndang ïaka kynhun ïalehkai jong ka ri South Africa da 52 ron ban rah syndon ïaka nam lahduh ba nyngkong haka ICC Women’s ODI World Cup kaba la long hynnin ka miet ha Dr. DY Patil Stadium Navi, Mumbai.
Ka Deepti Sharma bad ka Shafali Verma ki la ïalehkai bha da ka bat bad ka bol ban ïarap ïa ka India ban pynïoh ïa ka jingjop kaba khraw hadien ba ka South Africa ka la jop ïa ka jingkynting pisa bad ka la jied ban bol bad ailad ïaka India ban tied nyngkong ha kaba naka liang ka kynhun ïalehkai ka India kala ioh haduh 298 ron naki 50 over bad hap noh 7 wiket bad ki namtam napdeng ki thei ïalehkai kiba la noh sha u sup u thiar ka jingkamai ron ka India ki kynthup ïaka Shafali Verma kaba la kamai haduh 87 ron naki 78 bol bad ka Deepti Sharma kaba la kamai 58 ron naki 58 bol.
Haba beh ïaka thong kaba 299 ron ban rah ïaka nam jop, ka kynhun lehkai jong ka South Africa kila pyrshang ban lehkai bha ban rah ïaka nam lahduh jong kane ka lympung ba heh tam haka jinglehkai kriket haka pyrthei, ka jinglah ban kawang bol bha ka Deepti Sharma kala pynjem khnap ïaki thei lehkai ka South Africa ha kaba baroh kila liem lyndang lut tang hapoh 45.3 over bad kamai tang 246 ron ha kaba ka Deeti Sharma marwei kala khur haduh 5 wiket bad ai 39 ron naki 9.3 over.
Lyngba kane ka jingjop jong ka ri India, kala thaw syndon ïaka history ban rah ïaka nam lahduh ba nyngkong haka ICC Women’s ODI World Cup, kaba pyni ba kane ka jingjop ka long ka jingplie lynti ïa kiba bun ki thei lehkai kriket haka ri ban dang kiew shaphrang.
Naka liang ka President ka ri India ka Droupadi Murmu lem bad u Narendra Modi Prime Minister nalor kiwei kiwei ki heh sorkar ka ri India kila pynpaw ka jingsngewkmen bad ai ka jingkhublei ba kyrpang ïaka kynhun ïalehkai kriket ki kynthei ka ri kiba la lah ban lehkai bha bad rah ïaka nam ka burom jong ka ri lyngba ka jingjop donburom jong ki haka phainal ka ICC Women’s ODI World Cup kaba long ruh ka jingai mynsiem ïakiba bun ki thei lehkai kriket haka ri baroh kawei.