Nongpoh, Naiwieng 03: Ka skulbah University of Science and Technology Meghalaya (USTM) mynta ka sngi ka la pynlong ia ka 11th Convocation ceremony lane pynkup burom ia ki samla pule ha Central Auditorium, kaba long kum ka jingiaid lynti sha uwei pat u mawmer ha kaba ia dei ban kyntiew ia ka pule ka puthi.
Kane ka jingpynkup burom ia ki samla pule ka pynpaw ia ki dak ki shin jong ka jingkmen, ka jingsarong bad ka jingai mynsiem ia ki 1618 ngut ki samla pule kiba la ioh pdiang ia ki degree ba kynthup 762 ki undergraduates, 824 ki postgraduates, bad 32 kiba pyndep ia ka PhD. Na ka liang kane ka skulbah ka la pynkup burom ruh ia 54 ngut ki nonghikai kiba la ioh pdiang ia ka Golds Medal ba kynthup 24 ngut ki undergraduates, 25 ngut ki postgraduats bad 5 ngut kiba ioh pdiang ia ka khusnam kyrpang.
Ha kane ka sngi ba la pynkupburom ia kitei ki samla, la kynmaw burom ruh ia u (L) Dr. Zubeen Garg, u nongrwai, u nongshna phlim, u nongpynmih jingrwai uba la paw ha ki jylla shatei lam mihngi bad ha ka ri India hi baroh kawei, ha kaba une u riew pawkhmat u la ioh pdiang ruh ia ka Honorary D.Litt. Degree na kane ka skulbah USTM ha ka 10th Convocation, kiba dei halor ki synniang ki bynhei kiba u la synniang sha ka imlang ka sahlang bad la pynlong ruh ka jingsngapjar kaba 30 second kum ka jingkynmaw burom ia ka mynsiem jong u na ka bynta ba kan ioh ia kata ka jingjahthaid.
Ha kane ka jingpynkup burom la wan shim bynta da u Deputy Chief Minister ka jylla u Bah Sniawbhalang Dhar kum u kongsan bad la sakhi lang ruh da ka jingdon lang u Chancellor ka USTM u M. Hogue, u Chairman, Governing Council, Indian Institute of Science, Bangalore u Dr Senapathy Kris Gopalakrishnan lem bad kiwei kiwei, nalor kitei ki hajar ngut ki samla pule katei ka skulbah.
Nalor kitei ki hajar ngut ki samla ba la pynkup burom, ha kane ka sngi ka skulbah USTM ka la pynkupburom ruh ia u Dikshita Kalita (M.Sc. Zoology), uba la ioh pdiang ia ka Dr. A.P.J. Abdul Kalam Gold Medal Award kum u Best Postgraduate Student, bad u Sumu Boruah (B.Pharm.), uba la ioh pdiang ia ka P.A. Sangma Gold Medal Award kum u Best Undergraduate Student.
La pynkup burom ruh da ka Gold Medal award ia u Dikshita Kalita bad katba u Jeremaiah Warbah (8.A. Administration & Governance)u la ioh pdiang ia ka Chancellor’s Gold Medal Award.
Ha kane ka sngi, na ka liang u Bah Sniawbhalang Dhar kum symbut myntri ka sorkar jylla u la ai khublei kyrpang ia baroh ki samla kiba la shah pynkup burom halor kitei ki kyndan kiba ki la pyndep bad u ai ruh ka jingiaroh ia ka skulbah USTM kaba la don ka bynta ban kyntiew ia ka pule ka puthi ym tang haka jylla Meghalaya hynrei wat ha ki jylla shatei lam mihngi ka ri india.