Nongpoh, Naiwieng 06: Ka jingphohsniew ki paidbah jong 8 tylli ki shnong haka thaiñ Pahambir ba hap haka Raid Nonglyngdoh ban ioh noh ka jaka sumar kaba paka kala urlong hadien ba u MLA ka Nongpoh ba dei ruh u Chairman ka Health and Advisory Board ka sorkar jylla u Bah Mayral Born Syiem mynta ka sngi u la plie paidbah ïaka Pahambir Health and Wellness Centre kaba la sdang ban treikam noh ban ai ka jingshakri sha ki paidbah katei ka thaiñ ha kaba ïadei bad ka koit ka khiah, khamtam ki longkmie kiba kha kyllung.

Ha katei ka sngi ka jingplie paidbah ïa katei ka jaka sumar la sakhi ruh da ka jingdonlang u C Awasthi SDO ka Patharkhmah Civil Sub Division, ka Dr J Syiem kaba dei ka Doctor In charge ka Pahambir HWC, Bah Sensi Lyngdoh, Lyngdoh Raid Nonglyngdoh, Bah LS Pamshong Chairman Synjuk ki Rangbah Shnong Nongkhrah bad Nonglyngdoh, ki ophisar naka tnad ka koit ka khiah, ki nongïalam shnong lem bad ki paidbah nongshong shnong.

Haba kren ha kane ka sngi naka liang u Bah Mayral Born Syiem u la pynpaw ka jingsngewkmen kaba khraw ban iohi ïa ka jingkmen jong ki paidbah ka thaiñ hadien bala lah ban pynurlong ïa katei ka jaka sumar haka shnong Pahambir Them kaba long ka jingkyrkhu bad ka jingmyntoi kaba khraw ba ki paidbah kin ioh ka jingshakri ha kaba ïadei bad ka koit ka khiah namar ka sorkar ka don ïaka thong ban pynjan ïaki jaka sumar sha ki paidbah.

U la ong ruh ba ka Ri-Bhoi District ka dei ruh kaba la shah jied kum ka Aspirational District bad ka sorkar pdeng ka phaikhmat kyrpang ban theh ki kam pynroi khamtam ha kaba ïadei bad ka koit ka khiah ban kyntiew ïaka jingshakri, bad kane ka sngi ka dei ka sngi kaba sah jingkynmaw ha kaba ki sub-centre ha ki por ba mynshuwa ki ïapher bad kiba mynta naduh ki nongtrei, ki jaka sah jong ki nongtrei bad ki jaka sumar.

Ka jingpynmang pisa ka sorkar haka mang tyngka na uwei u snem sha uwei u snem kala nang kiew bad khamtam ban pynpoi ki jaka sumar ha man ki shnong bad ki jaka, ba ki paidbah kim dei ban mad jingeh, watla ki dang don shibun ki jingduna ha katei ka jaka sumar hynrei kum u MLA ryngkat ka tnad ka koit ka khiah kin sa shimkhia ban pynbit pynbiang ïa katei ka jaka sumar khnang ba kan long ka jingmyntoi bad ka jingkyrkhu ïaki paidbah khamtam ki longkmie ba armet ba kin leit ban kha khun ha katei ka jaka sumar jong ka sorkar kaba duna ka jinglut jingsep.