Nongpoh, Naiwieng 06: Namar ka jingsynjor kawei ka jingkieng ha ka shnong Umkynsir bad kaba la buh jingma ia ki paidbah nongleit nongwan ba ka lah ban khyllem ha kano kano ka por, ki nongialam ka HANM Western Ri Bhoi mynta ka sngi ki la leit syndon ban ai da ka jingthoh sha u Executive Engineer ka tnad PWD Nongpoh Division  na ka bynta ban shim khia halor katei ka Jingkieng kaba la buh jingma ia ki paidbah.

Ban kren halor kane ka jingma kaba lah ban ktah ia ki paidbah na ka jingsynjor katei ka jingkieng, u President ka HANM Ri Bhoi Sepngi u Bah Sumar Lyngdoh bad u General Secretary u Bah Anthony Syngkli mynta ka sngi ki la leit ban kynduh ia u Executive Engineer ka PWD Nongpoh Division bad ryngkat ka jingaiti ia ka jingtoh ban kyrpad lem ba ka tnad PWD ka dei ban shim khia nor mardor ban maramot noh ia katei ka jingkieng lane ban thaw ia ki lad ki lynti ban pynskhem ia katei ka jingkieng ka ban nym buh jingma ia ki paidbah.

Haba ia kren bad ki Nongthoh Khubor, u President ka HANM Ri Bhoi Sepngi u Bah Sumar Lyngdoh, u la ong ba ka seng ka shim ia kane ka bynta ban peitngor ia katei ka jingkieng, ka de namar ba ka seng ka lap ba katei ka jingkieng ka la sator bad buh jingma bad dei namar kane ka daw na ka bynta ka jingshngain ki paidbah nongleit nongwan ka seng ka la wan ai syndon da ka jingtoh sha u EE ka tnad PWD ban shim khia mardor halor katei ka jingkieng.

U la ong ruh shuwa ban leh ia kane ka kam, ka seng ka la dep kynduh ruh ia u MLA ka Jirang ban ia kren halor kane ka bynta ba kum ka seng ka wan ban kynduh ia u Executive Engineer na ka bynta ban shim khia mardor ban maramot ia ka jingkieng khnang ba kan nym buh jingma ia ki paidbah.

Shuh shuh, u la ong ruh ba ka seng ka sngewkmen ruh ba u Engineer uba la kular ban shim khia ia katei ka jingkieng bad na ka bynta ban shangain ki paidbah kin buh shuwa shipor da ki ki hume pipe markhap bad katei ka jingkeing kaba long ka jingshngain ia ki paidbah nongleit nongwan.

Ha kajuh  ka por ka seng ka ka ai khublei ruh ia u MLA ka Jirang u Bah Sosthenes Sohtun bad ruh ia u Executive Engineer ka tnad PWD Nongpoh Division kiba la kular da kaba shai sha ka seng ba kin shim khia ban maramot noh ia katei ka jingkieng, namar kumba long mynta ka jingsator katei ka jingkieng ka lah ban mih ki jingjia ba sngewsih ia ki kali paidbah kiba leit ba wan lyngba katei ka jingkieng, u la bynrap.