Nongpoh, Naiwieng 22: Kum ka jingpynpaw paidbah halor ka jingpawnam ka thain Tyrso bad Umtngam ba hap ha ka Mawhati Constituency ha Ri Bhoi District, da ka jingwan buhai ki kynhun sim Amur Falcon man la u snem bad ruh ka jingangnud ban pynlong kum ka jaka jngohkai pyrthei, ka Brup Hang Lang Tourism Promoting Society ryngkatka jingiatrei lang ka 7 Huts Production ka la rai ban pynlong ia ka Amur Falcon Festival lane kata ka tamasa jong ki kynhun sim Amur Falcon.

Lynba katei ka Societyka la rai ban pynlong ia kane ka Amur Falcon Society ha ka 5 bad 6 tarik u Nohprah 2025 ha ka shnong Umtngam ha Ri Bhoi District.

Kumba la pynpaw mynta ka sngi sha ki lad pathai khubor da u President u Bah Daminot Sylliang bad u Secretary u Bah Aibansuklang Nongrum, ki la ong ba ka jingthmu jong kane ka Amur Falcon Festival ka long ban pynpaw paidbah ia ka jingpaw nam jong katei ka thain da ka jingwan poi kitei ki sim amur falcon ba la kot da ki lak tylli bad ruh ban pynpaw ruh kiwei kiwei ki jaka kum ka jaka jngohkai pyrthei kum ka jingdon ka wah Umiam, ka Wah Umkhen  bad kiwei kiwei ki jaka kiba khring ia ki nongjngohkai pyrthei  ba la buh la sat lypa da ka mei mariang.

Ki la iathuh ruh ba kan don ruh ka jingai jinghikai kumno ban pynnheh pynsah ia ka mariang bad ruh ia ki mrad bapher bapher bad nalor kata kin don ruh ki Band ba paw na kylleng, ka jingiakop mareh marathon, ka jingiakop niah Cycle, ki DJ bad kiwei kiwei ha kaba la pynkhreh ruh ia ki khusnam sha ki nongjop, nalor kata ki la ong ruh kan don ruh ki bam tynrai bad kiwei kiwei ki bynta kiba pynphuh pynphieng ia kane ka tamasa.