Nongpoh, Naiwieng 21: Mynta ka sngi, kaba dei ka sngi ba Myntri Rangbah ka sorkar u Conrad K. Sangma, u la hiar ban iuhkjat dalade ha Madan Umsning Sports & Cultural Club (US&CC) kaba don ha Umsning Patarim, u la ai syndon ka jingkular ba un shimkhia hi dalade, na bynta ban pynbha ia ka madan ka US&CC, da kaba ong ruh ba ka dei ka madan kaba donkam shisha ban pynbha ha kiba bun ki liang.

Lah ruh ban kdew hangne, ba ki nongialam ka US&CC, na ka por sha ka por, ki la ud la nam sha ka sorkar jylla lyngba ka tnat ki kam ialalehkai, ha kaba ki la kyntu ia ka sorkar ba kin pynioh ia ki lad jingiarap ia katei ka madan, ha kaba ki la ïoh ruh ia ki jingkular, hynrei kat haduh mynta kim pat ïoh kano kano ka jingiarap, hynrei mynta ka sngi ba u Conrad K. Sangma, u la hiar hi dalade sha katei ka madan bad kular ban pynioh jingiarap, ka la pynkmen eh ia ki nongialam ka US&CC bad kyrmen ba kumba la kular ba kan urlong shisha.

Ha katei ka sngi ba u Conrad K. Sangma, u la hiar sha katei ka Madan, la don ruh ka jingialang, ha kaba la sakhi da ka jingdon u Bah Sosthenes Sohtun, Myntri Sorkar jylla, u Dr. Celestine Lyngdoh, MLA Umsning, u Damanbait Lamare, MLA Umroi, u Bah Charles Marngar, MLA Mawhati, ka Kong Rona Khymdeit, MDC Nongpoh, ki ophisar sorkar, ki nongialam ka thaiñ Umsning lem bad kiwei.

Haba kren ha katei ka sngi, ha ka jingkren u Bah Sosthenes Sohtun bad u Dr. Celestine Lyngdoh, ki la kubur ia ka jingdonkam ban pynbha ia ka Madan ha Umsning Patarim, ha kaba pynskhem ia ka jingangnud da ki nongialam ka US&CC, ba katei ka madan ka dei ban long kaba paka, khnang ba kan long kaba myntoi ia ki khun samla bad khamtam eh ba katei ka madan, ka dei ka madan kaba ju pynlong ia ki lympung ialehkai bapher bapher