Nongpoh, Naiwieng 22: Ka Umsning Town Durbar ba la iasnoh kti lang da ki 6 tylli ki Shnong ha Umsning town ha Ri Bhoi District ka la pynkit syndon shikhung ki jingdawa ha ki tyrpeng u Myntri Rangbah ka jylla u Conrad K. Sangma uba la wan ban shim bynta haka prokram kaba kyrpang ba la khot da ka Umsning Town Durbar kaba la long hynnin ka sngi ha Auditorium Hall ka Umsning Town Durbar.

Ha kane ka sngi na ka liang u Chairman ka Umsning town Durbar u Bah Rocky Kylla u la pynsngew ia kitei ki jingdawa bad ha kajuh ka por ruh u la aiti iaka dorkhas halor shibun ki jingdawa ba donkam na ka bynta ka jingbit jingbiang ki paidbah ka thain Umsning.

Ki mat kiba hakhmat eh ba la buh da ka Umsning town Durbar ki kynthup ban pynioh ia ka Scientific Solid and Waste Management, ka Stadium bad pynbha ia ka Madan ialehkai ha Patarim, ban pynioh ban ker ia ka jaka ba 10 acre jong ka Umsning town Durbar, ban wan rah ia ka Fire and Emergency Station ha Umsning, ban shna ia ka Parking Lot bad ka Market Complex bad kynthup ban pynbha ia ki surok bad ban pynbha briew ia ka sor Umsning nalor kiwei kiwei ki mat ba donkam.

Haba kren ha kane ka sngi u Myntri Rangbah ka jylla, u Conrad K. sangma u la pynpaw ia kaj ingkmen ban ia don bynta ha kane ka sngi na ka bynta ban ia kren halor ka bha ka miat bad ka roi ka par jong ki paidbah ka thain umsning bad kum u Myntri Rangbah ula kular ruh ban shim khia halor kitei ki mat ba la wan rah da ka Umsning Town Durbar.

U la ong ruh ba ka sorkar kaba u la ialam kam dei ka sorkar kaba pynbiej ia ki paidbah tang ha ka por election bad lada ym dei ka election ruh ka sorkar ka trei na ka bynta ka bha ka miat bad ka roi ka par u paidbah ha ka jylla.

Shuh shuh, u la ong ruh ba kum ki padibah pat ki hap ban sgnewthuh ba kum ka sorkar kam nym lah ban pynurlong lut ia baroh ki jingdonam u paidbah bad wat la kata ruh ka pynthikna ba kan phai khmat beit na ka bynta ki paidbah kumba ka Umsning town Durbar ruh ka la wan rah shibun ki jingdonkam bakum ka sorkar kan ialeh katba lah ban pynurlong na ka bynta ka jingmyntoi ki paidbah.

Kiwei kiwei kiba la ia don lang hakane ka sngi ki kynthup ia u Mytnri ka tnad C&RD u Bah Sosthenes Sohtun, u MLA ka Umsning u Dr. Celestine Lyngdoh, u MLA ka Mawhati u Bah Charles Marngar, u Chairman ka Umsning town Durbar u Bah Rocky Kylla, ki ophisar bad kiwei kiwei ki riew rangbah bad ki paidbah nongshong shnong ka thain Umsning.