Nongpoh, Naiwieng 25: Ki Nongialam ka Ri Bhoi Livestock and Supplier Association (RBL&SA) mynta ka sngi ki la mih shakhmat ban pynshai paidbah halor ka jingkynnoh jongki pyrshah ia ka tnad Pulit Ri Bhoi ba ki don ki Pulit kiba shim pisa na ki Kali Masi  bad ia kane ruh ha ka 19 tarik u Naiwieng 2025 ki la leit ban ujor sha u Deputy Commissioner ka Ri Bhoi.

Kane ka jingpynshai ki nongialam kane ka Association halor ka jingkynnoh pyrshah ia ki Pulit ka Ri Bhoi, ka dei ruh hadien ba ki la dep ban pynmih ha ki lad pathai khubor ba ki la kynnoh pyrshah ba ki don ki kynhun Pulit kiba pan pisa ha kaba la pynsngewthuh bakla da ki dkhot jongki.

Na ka liang ka Association ka la mih ruh ban pynshai paidbah sha ki lad pathai khubor, ka dei hadien ba mynta ka sngi ki la wan ban kynduh ia u Senior Superintendent of Police ban ia kren pynbeit ia kane ka kam kaba kum ka Association ka la kren pyrshah ia ka tnad Pulit kaba dei na ka daw ka jingbym ia sngewthuh jingmut ne khlem da wad ia ka jingshisha.

Haba kren sha ki lad pathai khubor, u President ka Ri Bhoi Livestock and Supplier Association, u Bah Pynshngain Shylla, u la ong ba baroh kine ki jingkynnoh pyrshah ka ka tnad Pulit ba ki lum pisa na ki Kali kit masi ka dei kaba la pynsngewthuh bakla da ki katto katne ki dkhot bad ha ka jingshisha ki Pulit ki talasi ia ki Kali ba ym don kot ym don sla kumba ki pulit ki la leh baroh shi katta ban tehlakam ia ki kali ba pynkhein ain.

Shuh shuh, u la ong ruh kaba sngewkmen ka dei hadien ka jingiakynduh mynta ka sngi bad une u heh pulit ka Ri Bhoi ba ki la ia kren sngewthuh bad pynshai ruh ia kata ka jingkynnoh bad kum ka Association ka sngewkmen ruh ba u heh pulit ka Ri Bhoi u la ai ka jingkular ban ia trei lang bad nangnge shakhmat lada don kano kano ki jingeh ba ki ia kynduh kim dei ban shuh kynthoh klumar bad ki dei ban pyntip sha ki heh pulit khnang ban lah ban tehlakam ia kino kini ki ba shim kabu, u la bynrap.