Nongpoh, Naiwieng 26: Kawei ka iing hapoh ka shnong Nongjri Umsning bad kaba dei ka iing jong ka Kong Iantibha Lamare bad u Bah Cobin Mawlong, ka la ingkhong hi khait bad baroh ki jingdon jingem hapoh katei ka iing ki la kylla dpei lut, katei ka dei hadien ba ka la kemding kynsan hynnin ka 11:30 baje eiei mynmiet.

Ia ka daw jong katei ka jingpluh king, la suba jur ba ka lah ban lah ban dei na ka jingthut bad kemding na u Battery Solar, namar katei ka longiing kam don bording ilektrik, hynrei la pyndonkam da ki Solar na bynta ban ioh jingshai.

Haba iadei bad katei ka jingpluh iing, ki riew paidbah haba ki la tip ia katei ka jingjia, ki la leit mar mar ban iarap ha ka ban pynlip ia ka ding kaba la klang bha, hynrei namar ba la jubor palat ka jingklang ki thylliej ding, ka pynlong ia ki paidbah ba kin ym lah ban leh eiei, kaba la pynlong ruh ba ka ding kan bam lut ia baroh ki jingdon jingem.

Ki Pulit ka tnat pynlip ding na Umiam, ki la la ialeh ban poi sha katei ka jaka, hynrei kim shym la poi ha ka por ba biang, hynrei ki poi sha katei ka jaka, hadien ba ka ding ka la dep bam lut bad pynkylla dpei ia baroh ki jingdon jingem hapoh katei ka iing.

Ha katei ka jingjia ym don ba mynsaw ne kino kino ki jingjia ba sngewsih, lait noh tang ka jingjulor ki jingdon jingem bad ki tiar ki tar.