Nongpoh, Naiwieng 27: Halor ka jingkam trai ka Shnong Bhoirymbong Lumdaitkhla ia ka khlaw kaba dei ka bri Raid kumba la mih ha ki lad pathai khubor ha ka 25 taraik u Naiwieng 2024, ka Shnong Bhoirymbong Lumsohpieng mynta ka sngi ka la lum kyrkieh ia ka executive committee na ka bynta ban ia kren halor katei ka jingkam trai ia katei ka khlaw kaba dei ka bri Raid.
Kum ban pynkynmaw, kane ka kynrum ka kynram hapdeng kine ki ar shnong ka la mih, ka dei hadien ba la don ki briew kiba leit pom tuh ia ki deing, ba ka shnong Lumsohpieng ka la ujor da ka ejehar bad ka shnong Lumdaitkhla pat ka la wan ban tuklar wat ia ka Letter Head ba pyndonkam ka Shnong Lumsohpieng da kaba kam trai pynban ia katei ka khlaw kaba dei ka bri Raid ba long trai da baroh ar tylli ki shnong kata ka Lumdaitkhla bad Lumsohpieng hadien ka jingphiah shnong bad ym kumba la kam da ka Shnong Lumdaitkhla.
Hadien ka jingialang u rangbah shnong u Bah Hamjngai Hinge, u la pynshai ba katei ka jingkam trai katei ka shnong Lumdaitkhla ia katei ka khlaw ka long kaba ym don nongrim ha kaba ka jinglong trai ka dei hi na baroh ar tylli ki shnong bad u la pynshia ruh halor ka jingpom dieng la ia shong pyrkhat haduh 3 sien hapdeng ka Central Executive Dorbar, hynrei ym shim la shim kano kano ka rai bad dei na kane ka daw ba ka Shnong ka la ujor da ka ejehar.
Haba kyntait ia ki jingkynnoh jong ki Nongialam Shnong Bhoirymbong Lumdaitkhla, ba katei ka khlaw Raid kadei kaba la pynbynta kyrpang naduh mynshuwa da ka Shnat Raid Mawpat, Mylliem Syiemship, la pynbynta ia kane ka khlaw, ha kaba la kdew ba ia kane ka khlaw la long trai da baroh ar tylli ki Shnong kata ka Bhoirymbong Lumdaitkhla bad ka Bhoirymbong Lumsohpieng, bad kaba sngewlyngngoh pat kum ka Dorbar Shnong Lumdaitkhla pat ka kam trai Marwei ia kane ka khlaw.
Halor ka jingkynnoh ba la pyndonkam bakla pat ia ka later head jong ka Dorbar Shnong, u la pynshai da kaba ong, hadien ba ka la don ka jingioh jingtip halor ka jingdon ki briew kiba pom be-aiñ ia ki dieng na katei ka khlaw, ka la don ka jingialang jong baroh ar tylli ki Dorbar Shnong lyngba ka Central Executive Committee (CEC) ban ia kren halor ban leh ei ei ia ki briew kiba pom dieng be-aiñ na kane ka khlaw, hynrei ha ki jingialang kaba la long haduh lai sien lai wat ka khlem poi shaei shaei ruh bad kaba khlem lah ban ai ia ka rai halor ban leh ei ei ia ki briew kiba pom dieng be-aiñ.
Dei halor ka jingbym shim khia halor kane ka kam, ka Dorbar Shnong Lumsohpieng ka la shim ia ka rai ban ujor ejahar noh pyrshah ia kitei ki briew kiba pom dieng be-aiñ bad ki pulit ki la ioh ruh ban Kem ia uwei na kiba pomdieng be-aiñ bad tang hadien katto katne por pat ia u tei u briew la leit ban pyllait hi da u Rangbah Shnong ka Lumdaitkhla khlem ka jingtip lang jong ka Dorbar Shnong Lumsohpieng kaba dei ka nongujor pyrshah ia kiba pomdieng be-aiñ na ka khlaw raid.
Shuh shuh, na ka liang u Rangbah Shnong Lumsohpieng, u la la kyntu ruh ia ka Dorbar Shnong Lumdaitkhla ba kan ban pynlong noh da ka jingialang hapdeng ki ar Dorbar Shnong ban ia kren sani bha halor kane kam bad dei tang da ka jingiatai sani lah ban wan rah biang ia ka jingiatylli hapdeng kine ki ar tylli ki shnong, u la bynrap.
