Shillong, Naiwieng 28: Kum kawei na ka lad ka lynti ban ai ka jingpynsngewthuh ne iarap ia ki samla pule ba kin tip kham bha shaphang ka jingkordor ha kaba ia dei bad ki kam kynshew ne lum pisa, ka sorkar jylla lyngba ka tnad Pule puthi mynta ka sngi ka la ia soi ia kata ka soskular ba la tip kum ka Memorandum of Understanding bad ka National Stock Exchange (NSE).
Haba ia soi ia kane ka memorandum of understanding la sakhi lang da ka jingdon lang u myntri rangbah ka jylla u Conrad K. Sangma, u myntri ka tnad pule puthi u Rakkam A. Sangma, u Chief Secretary ka jylla u Bah D.P Wahlang bad kiwei kiwei ki ophisar na ka tnad pule puthi nad na ka National Stoc Exchange.
Kumba la pynpaw ha ka kyrwoh, ka jingthmu ba la ia soi ia kane ka MoU ka dei ka sienjam ba ka sorkar ka shim ban ai ka jingnang jingstad ha ka liang ka lum ne kynshew pisa ia ki samla pule ha ki Kolej ba kin ioh jingshai ne lum jingtip ha kiba ia dei bad ki jingmyntoi ba ki ioh lyngba ki Bank, Insurance bad kiwei kiwei ki lad kynshew pisa kiba ai jingmyntoi ia ki samla pule.
Haba kren halor kane ka phang, u Myntri rangbah ka jylla u Conrad K. Sangma u la ong ba ki lad ai jinghikai shaphang ka jinglum ne kynshew pisa ka long shisha kaba donkam na ka bynta ki samla bad bun ki samla pule ki dang duna ban sngewthuh halor ka jingkordor ne ki lad ioh jingmyntoi lyngba ki Bank ba kum ki samla ne ki nongseng kam seng jam ki hap ban tip halor kine ki lad ai jingmyntoi lyngba ki bank.
U la bynrap ruh ban ai jinghikai kyrpang shaphang kata ka lad ban lum ne kynshew pisa, ka NSE kan shim ia ki lad ki lynti ban iarap ne ban pynsngewthuh ia ki samla pule halor kane ka bynta khnang ba kan nym buh jingma ia ka lawei ne ka pateng ban san wan ha kaba ia dei ba ka kam ban kynshew ne lum pisa.
