Ka jingiakhun Semi-Final ba nyngkong ka lympung Copa America kan long hapdeng ka Argentina pyrshah ia ka Canada, lashai ka 10 tarik ha ka por 5:30 ha ka por India bad ka jingiakhun kan long ha MetLife Stadium.
Haba phai halor ka jingdon ki rangialehkai, lah ban ong ba ka Argentina ka don ia ki rangialehkai kiba bna nam ha ka pyrthei, kata kaba kynthup ia u Emiliano Martinez, uba dei u rangapkol ba pawnam ha ka pyrthei, nangta ka don ruh ia ki rangialehkai shakhmat kiba kynthup ia u Lionel Messi, u Angel Di Maria, u Julian Alvarez, Alexis Mac Allister, u Rodrigo De Paul lem bad kiwei.
Ha ka jingiaid lynti ka Argentina ha kane ka Copa America 2024, ka Argentina ka shu jop lynter beit khlem rem naduh ha ka Group Stage, ha ka Round-16, ha ka Quarter Final bad kaba sah mynta ha ka Semi-Final ba kan iakhun pyrshah ia ka Canada.
Katba haba phai ha ka jingiaid lynti ka Canada, ka dei kaba donlang ha ka Group bad ka Argentina, ha kaba ka la jop shisien bad iakhaid shisien ha ka Group Stage, nangta ka la pynliem noh ia ka Venezuela da 4-3 ha ka (Tie Breaker) ha ka jingiakhun Quarter Final bad mynta kan sa iakhun ha ka Semi Final pyrshah ia ka Argentina.
Haba phai halor ka jingdon ia ki rangialehkai, ka Canada ha ka jingshisha kam pat don ia kita ki rangialehkai kiba bna nam palat ha ka pyrthei, hynrei ka don pat ia ki rangialehkai kiba la lehkai na ki Club ba pawnam ha ka pyrthei, kiba ju iakhun ha Buldesliga, English Primier League, League-1, Series-A lem bad ha kiwei pat ki lympung ialehkai ba la paw ha ka pyrthei.
Ka jingiakhun ha ka Semi-Final ba-ar, kan long hapdeng ka Columbia pyrshah ia ka Uruguay, ia kaba kin sa iakhun ha ka step jong ka 11 tarik mynta u bnai ha Bank of America Stadium.
