Khliehriat, Risaw 18 Wat la bun ki seng Bhalang ki la pyrshah ia ka jingpynsngew paidbah (Public Hearing) ba la pynlong da ka Meghalaya State Pollution Control Board (MSPCB) ha Wahiajer Narpuh na ka bynta ban sdang ïa ka karkhana pynmih dewbilat (Integrated Cement Plant), kaba lah ban pynmih ia u Clinker 3.3 MTPA, Cement 2.8 MTPA bad 16MW Waste Heat Recovery System) mynta ka sngi ka la iaid beit iaid ryntih kaba dei da ka jingkyrshan naduh ki nongialam shnong bad ki paidbah katei ka thain.
Kumba la sakhi ha kane ka sngi, la jan baraoh ki nongshong shnong bad ki nongialam Shnong ka thain Narpuh ki la ai ka jingkyrshan kaba pura ban pynmih ia kane ka Karkhana Dewbilat ba thymmai bad lait noh ki seng bhalang naduh ka KSU, HITO, FKGJP, HANM nalor kiwei kiwei ki seng bhalang kiba la pyrshah jur ia kane ka jingthmu ban wan rah ia ka Karkhana shna Dewbilat ba thymmai.
Kumba la paw pyrthei, kito kiba kyrshan naduh ki nongialam shnong bad ki paidbah ki la ioh ban ia shim bynta ha ka rynsan ban kren paidbah ban pynpaw ia ka jingkyrshan jongki, hynrei lait noh kiba la pyrshah kiba dei na ka kynhun seng bhalang kiba la shah khang lynti ha ki paidbah kim ioh ban shim byntaha katei ka jaka ba la pynlong ia ka jingpynsngew paidbah halor katei ka Karkhana shna Dewbilat.
Kumba la pynpaw ruh da ki nongialam seng bhalang, ki la pynpaw ba kim kwah ban ia tyngkhuh para jaid bynriew bad kane ka jingshah khang lynti jongki ha ki paidbah, ka dei tang ka buit sianti ki bar jylla kiba la pyrshang ban pynsngewthuh bakla ia ki paidbah katei ka thain.
Ki nongialam seng bhalang ki la pynpaw ruh ba kane ka jingpynlong ia ka Public Hearing ka dei tang ban pyndep rukom da ka sorkar bad ki la pynpaw ruh ia ka jingsngewkhia halor ka jingshah ialam bakla ki paidbah ha kaba wat la mynta ki pyrshah ia ki seng bhalang bad kan poi ka por ba kin sa kynmaw, ha kaba kum ki seng bhalang ki pyndep ia la ka kamram bad kane ka jingjia u mynder u la shu rkhie ba ngi ia tyngkhun para jaid bynriew.
