U Bah Damanbait Lamare, MLA Umroi, ha ryngkat ka jingdon u Bah Rangkynsai Kharbuki, mynta ka sngi ki la leit ban plie paidbah ia hynriew tylli ki skim pynroi hapoh ka shnong Lumdaitkhla, Bhoirymbong bad lyngba jong katei ka sngi, ki la ioh ruh ban plie paidbah noh ia ka ïing Dorbar ka shnong Lumdaitkhla.
Ha katei ka sngi ba la plie paidbah ia kitei ki skim pynroi, nalor ka jingdon kitei ki nongmihkhmat ka Umroi, la sakhi ruh da ka jingdon u Bah T. Rympei, Rangbah Shnong Lumdaitkhla, u Bah S. Pakyntien, Officer In-charge ka Khapmara PIC lem bad kiwei ki riew rangbah ka shnong Lumdaitkhla.
Kitei ki skim pynroi hapoh katei ka shnong bad kaba la plie paidbah mynta ka sngi, ki dei kum ki building ICDS Centre, Anganwadi Centre ha kaba la tei ha ki Dong bapher bapher hapoh ka shnong Lumdaitkhla, hynrei kaba la pynkmen eh ha katei ka sngi, ka dei hadien ba ka Shnong Lumdaitkhla, ka la ïoh ban plie paidbah noh ia ka Ïing Dorbar Shnong, kaba la sdang ban tei naduh ka por ba long MLA da u Ma Ngaitlang Dhar.
Haba iadei bad katei ka jingplie paidbah ia kitei ki skim pynroi, na ka liang ki nongialam shnong, ki Rangbah bad ki longkmie, ki la ai jingiaroh eh ia u Damanbait Lamare, uba la shimkhia ban pynioh ia kitei ki skim pynroi hapoh ka shnong ka thaw bad kaba la ai jingmyntoi ia ki paidbah bad khamtam eh na bynta ki khynnah rit.
U Bah Damanbait Lamare, haba u kren ha katei ka sngi, u la ai ka jingkular ba kum u nongmihkhmat ba un dang trei shitom na bynta ban pynioh shuh shuh ia ki kam pynroi hapoh ka Umroi Constituency hi baroh kawei bad ha kawei ka bynta u la khot la wer ruh ia ki paidbah ban ai ia ka jingiatrei lang na ka bynta ban dang lah ban pynurlong ia shibun ki jingangnud ki paidbah ha kaba ia dei bad ki kam pynroi sha ki shnong ki thaw.
