Nongpoh, Risaw 23: Ha kaba nyngkong, ka seng Ri Bhoi Youth Welfare Organization (RBYWO) ka la pynpaw ia ka jingsngewkmen sha ka tnad PWD lyngba ka ophis u Chief Engineer, ki la wan rah haduh 43 km ban pynbha ia ki surok na ka bynta ki 18 tylli ki shnong kiba hap hapoh ka Umroi Constituency bad ha kawei pat ka bynta ki la daw aba dei ban pynkylla ia ka rukom khot tender ia ki 17 tylli ki surok ba hap ha Umroi Constituency.
Katkum ka dorkhas ba la phah sha u Chief Engineer ka tnad PWD, ka seng ka la pynpaw ha kaba ia dei bad ka jingkhot tender, kaba lah mih haki kot khubor haka 11-10-2024, ba na ka liang ka seng kam sngewiahap, ha kaba ka la ioh pdiang ruh ia ka jingujor na kiba bun ki Contractor ba ka jingkhot tender ka long tang kawei ka tender na ka bynta ki 17 tlli ki surok ha kitei ki shnong ba hap ha Umroi Constituency.
“Kum ki para contractor ngi sngewduh jingkyrmen khamtam ha kane ka juk kyrduh kam bad lada haduh 17 tylli ki shnong yn pyntrei beit tang ha uwei u contractor ka long ka bymlah ban pdiang bad ka iohi kumba don ki kam high level ha kane ka rukom khot tender, la pynpaw ha ka dorkhas.
La pynpaw ruh ba kim ju lap kum kane rukom khot tender, kumta ngi kwah ba ka ophis badonburom u Chief Engineer kan pynshai halor kane kam khot tedner bad ban khot beit la ka jong ka jong ka shnong kumba juh leh khnang ba kiwei ki contractor ruh kin iohkam ioh jam lang.
Shuh shuh, ka seng ka kyrmen ba ka jingshim khia u Chief Engineer halor kane ka phang kan wanrah ka jingmyntoi lang ym tang naka bynta uwei u Contractor, bad ka seng ka da kyrpad ba kin sngewbha ban phai khmat lem naka bynta kiwei de ki constituency ka them Ribhoi ban ia kiew lem khlem da thew shiliang.
