Ka samla Angelia N Marwein kaba la mihkhmat ia ka jylla ban iakhun ha ka lympung iakop thei bhabriew bapawnam ha ka ri, ia kaba la tip kum ka Femina Miss India 2024 wat lada kam shym la ioh ia ka nam jop ha katei ka lympung, hynrei kadei pat ka nongjop ia ki paidbah ka jylla ha kaba ka la lah ban poi haduh ka thup jong ki hynniew ngut ki thei bhabriew kiba kynsai tam ha ka ri bad ioh ruh ia ka subtitle Miss Multimedia.
Kumban shu kdew ka samla Angelia N Marwein kaba dei ruh ka Femina Miss Meghalaya 2024, ka la lah ruh ban long ka lahduh napdeng ki thei bhabriew ha ka thain shatei lam mihngi, da kaba ioh ia ka nam Femina Miss India North East.
Haba phai khyndiat ia katei ka lympung kaba la pynlong hynnin ka miet ha ka nongbah Mumbai, kumba 30 ngut ki samla bhabriew na ki 29 tylli ki jylla ka ri bad kawei ka Union Territory ki la wan ban iashim ha kane ka lympung ban iakhun ia katei ka nam lahduh ban ioh mihkhmat pat ia ka ri, sha ka lympung Miss World 2025.
Ka samla Nikita Porwal na ka jylla Madhya Pradesh, ka la ioh ban rah ia ka nam kum ka Femina Miss India, 2024 bad lyngba kane ka jingjop kan sa ioh pat ban ban leit mihkhmat ia ka ri sha ka lympung Miss World 2025. Ha ka kyrdan kaba ar la ioh da ka samla Rekha Pandey na ka Union Territory bad ha ka kyrdan kaba lai pat la ioh da ka samla Ayushi Dholakia na ka jylla Gujarat.
