Ka KSU Pamphlang Area Unit ryngkat ka Dorbar Shnong Pawphlang, ki la maham jur halor ki kam leh khlem akor ba la bret pathar ia ki jakhlia ha shi lynter ka surok Lad Jynrai sha Mawkyrwat, kaba iaid lyngba ka shnong Photdei ha South West Khasi Hills District, kaba don hajan ka wah Rilang bad ia kane la lap da ka KSU bad ka Shnong ba ki riew duna ha ka pyrkhat ka pyrdain kim don satia kata ka jingkitkhlieh ban iada ia ka mariang bad ruh na ka bynta ka pateng ka pakit.
Halor kane ka jingbret pathar ia ki jakhlia ha shi lynter ka surok ban poi sha ka Wah Rilang, ka seng KSU Pawphlang Area Unit ryngkat ka Dorbar Shnong Pawphlang, ki la pynkhuid noh ia ki jakhlia baroh bad halor kane ka jingleh jakhlia, ki la buh ruh ia ka jingmaham ba tyngeh ia kito kiba dang leh riewdum bad kiba hun ban leh khuid tang ha la ïing bad pyllaw ïing lajong khlem da kheiñ snep ia ka Mei Mariang.
Shuh shuh, ka kyrwoh kaba shai na ka seng lyngba u General Secretary KSU Pawphlang Area Unit, u samla Brestar Kharsohphoh ryngkat ka Dorbar Shnong Pawphlang lyngba u Myntri Shnong, u Bah Hetstarwel Kharlangiong, ki la maham jur ba lada dang lap nangne shakhmat, ia kito kiba bret jakhlia ha ki surok bad ki jaka paidbah, kin ngat ha ka jingshah pynshitom kaba tyngeh.
