U Bah Sosthenes Sohtun, MLA Jirang, ha ryngkat ka jingdon ki riew rangbah ka thain Jirang, hynnin ka sngi u la leit ban jurip ia ka Sub-Centre kaba dang iaid shaid shaid ha ka jingpyntrei.
Haba iadei bad katei ka jingleit jurip, u Bah Sosthenes Sohtun, u la ong ba ka nongrim kaba la pynlong ia u ba un leit jurip hi dalade, ka long ba u kwah ba katei ka Sub-Centre kan dep kloi kumba la buh ia ka por ban pyndep.
U la ong ruh, ba kum u MLA shisien ba la wan ki kam pynroi hapoh ka thain kaba u long kum u nongmihkhmat, ka long ba u kwah ba kin dep kloi bad ba kin da ai shisha ia kata ka jingmyntoi na bynta ki paidbah, kiba deihok ban ioh jingmyntoi.
Na kaba la iathuh da u Bah Sosthenes Sohtun, u la ong ba katei ka Sub-Centre, kan sa ai jingmyntoi ia kumba 9 tylli ei ei ki shnong kiba don ha katei ka thain, kaba dei ruh ka thain ba la jan bad ka khappud Assam, ha kaba lyngba katei ka Sub-Centre kan sa long shisha ka ban ai jingmyntoi shibun eh ia ki paidbah bad khamtam eh haba iadei bad ban ioh ai jingsumar ia ki paidbah jong katei ka thain.
