Nongpoh, Nohprah 17: Hynnin ka sngi, u Bah Sosthenes Sohtun, MLA Jirang, u la leit ban plie paidbah noh ia lai tylli ki building ba thymmai ha ki skul sorkar, ia kaba u la pynioh kyrpang ha kito ki shnong kiba donkam eh ban kyntiew ia ka pule puthi.
Kitei ki skul sorkar, kiba la ioh ia ki building ba thymmai bad kaba la ioh ban plie paidbah hynnin ka sngi, ki kynthup ia ka Nongwah Mawlieñ Govt. LP School, la tei ha ka jinglut kaba la kot sha ka T. 36 lak tam, ka Paham-Umshru Govt. LP School la tei ha ka jinglut kaba la kot sha ka T. 44 lak tam, katba ka Nongrim Jirang Govt. LP School la tei ha ka jinglut kaba la kot sha ka T. 36 lak tam bad haba khein lang, ka la kot sha ka T. 1.16 klur tam.
Lyngba katei ka sngi, kaba la ioh ban plie noh ia kitei ki building ba thymmai, ki dei ki shnong kiba hap ha Jirang Constituency bad kiba dei ruh ki shnong kiba don ha ki thain Nongkyndong, ha kaba ki dei ruh ki shnong, kiba donkam shisha ban kyntiew ia ka pule puthi ha ki khynnah kiba dang rit ka rta.
Haba iadei bad katei ka jinglah ban plie noh ia kitei ki building ba thymmai, ka la pynkmen shikatdei eh ia ki khynnah skul, kiba leit ban pule hapoh kitei ki skul bad kumjuh ruh ia ki Nonghikai.
Kiba la sakhi ha katei ka sngi, ba la plie ia kitei ki building ba thymmai, ha ka jingdon ki ophisar na ka tnat pule puthi, ki nongialam shnong, ki nonghikai bad ki khynnah skul.
Halor ka jingurlong bad ioh ia kitei ki building ba thymmai ha kitei ki skul, na ka liang u MLA Jirang, u la ai ka jingiaroh ia ka sorkar jylla bad khamtam eh ia ka tnat pule puthi, kaba la sngap ia ka jingdawa jong ki paidbah bad kumjuh ia ka jingpynsngew jong u MLA, halor ka jingdonkam jong ki paidbah ha kitei ki shnong.
PYNIOH BUILDING THYMMAI U MLA HA 3 TYLLI KI SKUL SORKAR, HA KI SHNONG KIBA DONKAM EH KA PULE PUTHI
