NONGPOH, NOHPRAH 17: Ka Regional Institute of Advanced Studies (RIAS) Music Center ne ka jaka ka ban sa ai jinghikai halor ka put ka tem bad ruh ka ban sa ai jinghikai sha ki samla ha ki lain pule Komputer, kaba don ha Nongpoh Town Complex, la plie paidbah noh mynta ka sngi da u Bah Mariahom Kharkrang, u ophisar IPS ba la shongthait, uba dei u nongaiktien ka BJP ha ka jylla Meghalaya.
Haba plie paidbah ia katei ka RIAS Music Center, la sakhi da ka jingdon u Bah Khrawbok Basaiawmoit, Vice-President ka BJP ha Meghalaya, nangta u Bah Skhemborlang Swet, Managing Director ka RIAS, ka Madona Syngkli, Secretary ka RIAS, ka Dr. Tyra Suting, Coordinator ka RIAS, ki nongialam shnong ka shnong Nongpo, ki samla kiba leit ban shah ai jinghikai ha katei ka shlem lem bad kiwei.
Kum ban shu kdew hangne, ba ia ka RIAS la sdang ban treikam naduh u snem 2018, ha kaba nalor ka kam ba ki la ai jinghikai ha ka put ka tem, hynrei la ju ai ruh ka jinghikai sha ki samla ha ka lain ki kor komputer bad kumba ka long haduh mynta, ki la don kumba 1,300 ngut ki samla kiba la ioh ia ka jinghikai lyngba katei ka shlem kaba ai jinghikai ia ki samla, kiba kwah shisha ban tip ha ka put ka tem bad ruh ha ka lain ki Komputer.
Lyngba katei ka sngi, ia kaba la plie paidbah ia katei ka RIAS Music Center, ka la long ruh kum shibynta ia ka rukom trei kam babha jong katei ka shlem ai jinghikai bad kaba la ai jinghikai ia kiba bun ngut ki samla bad khamtam eh ia kito ki samla, kiba don sap ha ka put ka tem bad ruh na bynta jong kito kiba don ia ka sap ha ki lain Komputer.
Haba ai jingkren ruh ha kane ka sngi kum u kongsan, u Bah Mariohom Kharkrang u la ai khublei kyrpang ia katei ka shlem ai jinghikai shaphang ka put ka tem bad ruh shaphang ka jingpule ia ka jingstad Computer bad kane baroh ka urlong ka dei ka jingshim khia bad ka jingkitkhlieh ki nongialam ne ki nongseng ia kane ka shlem ai jinghikai.
Haba kaba pynshlur ia ki samla kajuk mynta, u Bah Kharkrang u la ong, “ ha kane ka juk stad ba mynta kam pat biang tang ban pyndep ia ka kyrdan doctorate ne master degree, hynrei ki samla ki dei ban don kata ka jingtip ha kiwei kiwei ki kam (Skilled Developmet” nammar ha kum kane ka juk iabeh jingstad khlem da don ka jingstad ha kiwei pat ki bynta ka long kaba eh ia ki khun samla ban ioh kam ioh jam”.
U la kyntu ruh ba ki nongpyniaid kane ka shlem kin dang trei shitom bad kan poi ka por ba kin don la ka jong ka jaka ai jinghikai bad khmih lynti ruh ba kane ka shlem kan long shisha ka jingkyrkhu ia ki khun samla ka Ri Bhoi bad ka jylla hi baroh kawei, ba kin dang pyntbit ia lade ban trei ha kano kano ka kam khamtam kaba ki ioh jinghikai ha ka put ka tem bad ruh ha ka jingstad jong ka kor Computer, u la bynrap.
