Shillong, Lber 18: Ha ka jingjia kem pang ki khynnah skul kiba na ka jylla Meghalaya kiba pule ha kawei ka skul shimet ha ka jylla Karnataka, la ioh khubor pat ba sa u wei u khynnah skul ba la tip kyrteng kum u Namebantei Marweiñ khun jong ka Shimtisful Marweiñ bad u Bah Tobarlin Nongsiej na Nongstoiñ u la khlad noh hadien ka jingban ka jingpang kaba jur.
Lah ban kdew, ba ki khynnah skul kiba don kumba 23 ngut eiei kiba napoh ka jylla Meghalaya, kiba sah ha kawei ka hostel ba la kynnoh pyniaid beaiñ jong ka skul Gokul Educational Institution Residential School kaba don ha ka shnong T, Kagepura, Mandya District, Karnataka ki la kem pang kynsan tang mar ia dep bam ia ka jingbam kaba la sah miet bad don bih kaba la wanrah na ki jaka lehniam holi, ha kane ka jingbam ia katei ka jingbam sahmiet nyngkong u wei u khynnah skul ba la tip kyrteng kum u Khrehlang Khongtani na ka shnong Lyndem, Pynursla u la khlad noh ha ka sngi U Blei.
Halor katei ka jingjia kaba sngewsih, na ka liang ka sorkar jylla Meghalaya, ka la btah ia ki bor ka tnad pule puthi da kaba phah ia ki ophisar sha katei ka jylla Karnataka ban leit jurip bad ban tohkit kumjuh ban synranlang ruh ia ki kmie ki kpa jong ki khynnah kiba dang shah sumar ha katei ka jylla bad ban phah ia ka kaiphod halor ka jinglong jingman ki khynnah skul ha katei ka jylla.
Na ka liang u Myntri Rangbah ka jylla u Conrad K Sangma u la pynpaw ia ka jingsngewsih bad jingsngewkhia halor katei ka jingjia bad ruh ban pynbna ban ai song jingiarap sha ki bahaiing jong kitei kiba la khlad 3 lak tyngka kumjuh ruh ban pyntikna ia ki jingsumar kiba paka ia kiwei pat kiba dang don hapdeng ka jingshah sumar.
Shuh shuh ruh, ban ioh ia ka jingtip kaba bniah bad ban buddien ia katei ka jingjia, u Bah Cyril V Diengdoh IAS, Commissioner & Secretary, ka tnad Home (Police) Department u la poi sha katei ka jylla kumjuh ban leit peit ia ki khynnah kiba dang shah sumar ha ka jingiadonlang ruh ki bor pyniaid district ka Mandya District.
Na ka liang u District Magistrate Dr Kumar, IAS ka Mandya District, u la pyntip ba halor katei ka jingjia la kem ia u trai jong katei ka skul bad ruh ia u hostel warden bad ka jingtohkit ka dang iaid shakhmat.
