Nongpoh, Lber 18: Namar ka jingjur palat ka jngthang khlaw pathar ha Ri Bhoi District ha kane ka aiom tyrkhong, kaba la buh jingma ha baroh ki liang, u District Magistrate ka Ri Bhoi, u Abhilash Baranwal u la pynjari syndon da ka section 163 BNSS ha Ri Bhoi, ban khang pyrshah ia kino kino ki riew shimet ne ki kynhun ba thang khlaw ba kane ka buh jingma ha kane ka aiom tyrkhong.
Haba kren sha ki lad pathai khubor, u District Magistrate ka Ri Bhoi, u Abhilash Baranwal, u la png ba ka la pynjari ia katei ka kyndon ain, ka long ba khang pyrshah ban thang khlaw, namar kane ka jingthang khlaw ka ktah ia ka jingim briew, ka ktah ia ki mrad bad ruh wat ia ka mei mariang.
U la iathuh ruh ba ka bor synshar District ka la dep btah ruh ia ki ar tylli ki tnad treikam sorkar kata ka DFO Social Forestry bad ka tnad Soil and Water Conservation ba kin shim khia kane ka kam ban pyntip sha baroh ki nongialam shnong ban khang na ka jingthang ia ki khlaw ki btap.
Kino kino kiba ialeh pyrshah kin hap ha ka jingpynshitom katkum katei ka kyndon aiñ bad ruh na ka laing ka bor synshar District ruh ka kyrpad jur ia ki nongialam shnong ba kin ia trei lang, khnang ban lah ban iada na ka jingthang khlaw pathar, kaba wan rah ia ki jingjia ba sngewsih kum ka jingpluh ing, ka jingktah ia ki mynsiem briew, ki mrad wat ka jingpynjot ia ka mei mariang.
Ha kaba ia dei bad kane ka bynta, na ka liang ka ophis u Superintendent of Police ka Ri Bhoi ruh ki la pynmih da ka jingthoh ba kyrpad ia ki paidbah ka dong Ri Bhoi ba kin nym dei ban thang khlaw klumar bad ki pan ruh ka jingiatrei lang khnang ban lah ban iada na kino kino ki jingjia ba sngewsih kiba ktah ia ki briew, ia ki mrad bad ka mei mariang.
