Nongpoh, Nohprah 12: Tang hadien shi sngi ba u MDC ka NPP u Bah Victor Rani, uba la pyniasoh noh sha ka party Congress, u la kynnoh pyrshah ia ki nongialam ka NPP Jirang Block bad ia u Bah Sosthenes Sohtun kum u MLA bad u President ka Jirang Block, ba ka don ka jingiasylla ban pynduh ticket ia u na ka party NPP na Jirang Constituency ban ia khun ha kane ka election MDC 2025, ki nongialam ka NPP Jirang Block mynta ka sngi ki la pynlong ia ka jingialang ba kyrkieh ban ia kren ne ia tai halor katei ka jingshah kynnoh kaba ki la pynpaw ba ka dei tang ka jingkynnoh kaba ym don nongrim.
Ia kane ka jingialang la pynlong ha Byrnihat ha ka jingdon lang u District president ka NPP u Bah Clement Mawlong, u MLA bad President ka Jirang Block u Bah Sosthenes Sohtun bad kynthup ia baroh ki nongialam ka NPP na Jirang, kiba la pynpaw ia ka jingsngewlyngngoh halor ka jingshah kynnoh ki nongialam ba ki kyntatit ban ai ticket ia u Bah Victor Rani, kaba u la leit ban pyniasoh sha ka Congress Party.
Haba kren sha ki lad pathai khubor, u Bah Sosthenes Sohtun MLA bad President ka Jirang Block, u District President ka NPP u bah Clement Mawlong bad u President ka NYPF Jirang Block, u Bah Marcus Lapasam, ki la kyntait war halor ka jingkynnoh u Bah Victor Rani kum u MDC ba ka party Ticket ka kyntait ban ai ticket bad katei ka ka jingkynnoh ka long kaba ym don nongrim satia.
Ki la pynshai ruh kumba la kynnoh da u Bah Victor Rani ba ka don ka jingiasylla pynduh ticket ia u na ka party NPP ka dei kaba ym don nongrim, hynrei dei u Bah Victor Rani hi uba leh jngai na ki nongialam bad na ka party bad wat la katta ruh ki la khot la wer ia u ban ia pynbeit naduh ka Jirang Block, ki nongialam ka District NPP bad ruh wat sha ki nongialam ka State NPP, hynrei u Bah Victor Rani u la kyntait ban wan ia kren bad ha kaba khatduh u kynnoh kylla ia ki nongialam, ha kaba wat ki nongialam bad ki paidbah ruh kim kwah shuh ia u ban dang ia khun na ka daw kaba u ju leh jngai na ki nongialam bad na ki paidbah ka Constituency kum uta u sitting MDC ka Jirang.
Kumba la pynshai ruh da u MLA u Bah Sosthenes Sohtun, la ong ba kam don kano kano ka jingiasylla buit tuh ban pynduh ticket, hynrei la khot ia u Bah Victor Rani ban ia kren pynbeit, halor shibun ki jingujor ki nongialam ba ki ioh na ki paidbah kaba long shi bynta ban pynkhlain ia ka party ha kane ka election MDC, hynrei dei u Bah Victor Rani hi uba la kyntait bad kynnoh kylla ba ia sylla pynduh ticket.
Shuh shuh, ki la pynpaw ruh ba dei ka jingphet noh u Bah Victor Rani sha ka party Congress ba ki nongialam ki la hap ban lum kyrkieh ia ka jingialang mynta ka sngi, ba ki la sah ha ka umdum bad ki la hap ban ia kren halor ka ticket jong ka party kaba haduh mynta kim shym la lah ban shim rai wat la don 3 ngut kina la pan ticket kiba kynthup ia u Bah Albertus Lapang, u Bah Kitboklang Khongiong bad u Bah Balawan Syiemiong, ha kaba ha kane ka jingialang la mih ruh ka kyrteng ba hap ia khun hi u MLA ha kane ka election MDC, hynrei kim pat lah pat ban shim ia ka rai ha kaba ki hap ban ia shong pyrkhat biang para nongnialam, ki la pynshai shuh shuh.
