Nongpoh, Risaw 15: Ym tang ba ka buh jingma ia ki phew ngut mynsiem ba kordor jong ki nongshong ha kawei ka Bus Night Super kaba kit ia ki briew na Shillong ban leit sha West Bengal, hynrei ka jingdih buaid u Dribar ka la pynsohsohat bad pynjynjar ruh ia ki nongshong hapoh katei ka Bus, ha kaba ki bor pulit ka Ri Bhoi hynnin ka miet ki la hap ban pynsangeh noh ia katei ka Bus tang na ka daw ka jingbuaid u Dribar.

Kane ka Bus Night Super Bus ka dei kaba don ia u number WB -29- C – 3048 bad kaba la niah da u  Suddam Gayan na Mendanapur West Bangal bad katei ka Bus kaba u la niah ka la shah bat noh ha Nongpoh ha ka jingkhynra Kali ki bor pulit ka Ri Bhoi kiba la pyrkhing bha ia kino kino ki Kali ba pynkheiñ ain.

Ha kane ka jingkhynra ia ki Kali la don lang naduh u Senior Superintendent of Police ka Ri Bhoi u VS Rathore, u Additional SP ka Ri Bhoi u Orraville Massar, ki pulit ophisar lem bad kiwei kiwei ki Pulit.

Kaba pynlyngngoh ia ki heh pulit, ka dei hadien ba la pynsangeh ia katei ka Bus bad haba la phah put ia ka Machine ban tip ia kiba dih kyiad lap pynban ba utei u dribar u la buaid katkum ba la lap ha katei ka Machine.

Kumba la sakhi bad iohi, kane ka jingdih buaid une u dribar ka la pynjynjar ia ki nongshong hapoh katei ka Bus ha kaba ki hap ban ap da ki kynta haduh ba la pynlait da ki Pulit ba ki phah ap ia u dribar haduh ba un da pyngngad na kaba buaid bad kitei ki nongshong hapoh katei ka bus ki la hap ban hiar bad ap da ki kynta bad ruh ki hap ban bam jingbam harud ka surok kaba la pynjynjar ia ki kum kita ki nongshong hapoh katei ka Bus.

Kane ka jingbat ki Pulit ia katei ka Bus ym tang ban dain kuna ia utei u dribar ba la buaid, hynrei ki bor pulit ki hap ban pyrkhat ruh ia ki mynsiem ba kordor jong kitei ki nonghsong hapoh ka Bus ban nym jia kino kino ki jingjia ba sngewsih bad dei tad haduh ba u dribar u la pyngngad ki sa pynlait ban leit bad u dribar u hap ban siew sa ia ka kuna namar ka jingpynkhein ain ban dih kyiad ha ka por ba niah kali.