Shillong, Jylliew 26: Hadien ba ki bor pulit ka Special Investigation Team (SIT) ki la wan ialam sha nongbah Shillong ia ki 3 ngut kiwei pat ki briew ba la kynnoh donkti ban pynjulor ia ki sakhi sabut halor ka jingshah pyniap u Raja Raghuvanshi ha la ka kurim ka Sonam Raghuvanshi, mynta ka sngi la ialam tian bishar ia ki sha ka Iingkashari jong ka District and Session Court ha nongbah Shillong.
Kine ki 3 ngut kiba la shah kem ha ki pulit ka SIT ki kynthup ia u Silome James, Balbir Ahirbar ba khot sin u Ballu bad u Lokendra Singh Tomar, kiba la shah kem na Indore bad kiwei kiwei ki jaka.
Ha ka jingtian bishar mynta ka sngi, na ka liang ka Iingkashari ka la ai por ia ki pulit ban tohkit 6 sngi, watla ki pulit ki la pan por 8 sngi na bynta ka police custody.
Ka jingkem ia kine ki 3 ngut ka long halor ka jingdonkti jong ki ban pynjulor ne pyndam ia ki sakhi satar ba iadei bad ka jingshah pyniap u Raja Raghuvanshi ha Sohra.
U Assistant Public Prosecutor, u Tushar Chanda u la pyntip ba ha kane ka jingtian bishar ia kine ki 3 ngut ka Iingkashari ka la ai por ia ki pulit ban pynlong jingtohkit ba bniah na bynta 6 sngi watla ki pulit kila pan por 8 sngi.
