Nongpoh, Jymmang 31: Ka jingmih jong ki jingjia tyngkhuh kali ba khah khah ha ki thain Tyrso jongka Ri Bhoi District kala pynlong iaka Khasi Students Union (KSU) Tyrso Unit ban pynmih iaka jingmaham kaba tyngeh sha ki nongniah kali, khamtam kito kiba ju mlien ban pynher sted bad buh jingma iaki paidbah nongleit nongwan ba kidei ban niah da ka akor ka burom bad ym ban shu pynher sted haba ki iaid ha ki surok.
Ia kane ka jingmaham la pynmih da u samla Playerful Mashli, President ka KSU Tyrso Unit uba la ong ba nangne shakhmat, ki nongniah kali kidei ban long kiba don iaka jingkitkhlieh bad ban niah da ka akor ka burom ym ban shu pynher sted bad buh jingma iaki paidbah nongleit nongwan.
Katei ka jingmaham ka seng kadei ruh hadien ba bun na ki paidbah ki la wan ban ujor sha ki nongialam ka seng namar ka jingdon jong ki katto katne ki nongniah kali kiba niah khlem akor bad kiba ju mlien ban pynher sted iaki kali kiba la wanrah bunsien iaki jingmynsaw bad ki jingjia ba sngewsih ia ki paidbah ba lui lui la kadei ha ki shnong ki thaw ne wat ha ki jaka ba don ki skul bad khyllung khynnah.
Na ka liang ka seng kala maham ruh ba lada lap nangne shakhmat ia kiba leh pyrshah, ka seng kam banse ban leh da kaba tyngeh wat lada dei ban poi shaki bor jong ka ain ruh, kumta kum ka seng ka kyrpad ia baroh ki paidbah nongshong shnong ba kin ai iaka jingiatreilang ba kin pyntip ruh shaka seng lada don kino kino kiba leh pyrshah nangne shakhmat.
Sa Peit Ruh
