Nongpoh, Lber 06: Ban kyntiew ia ki kam thain jain bad ki kam thir ksai khamtam ba ka Ri Bhoi District ka dei kawei na ka Distrct kaba la paw bha ha ka jingpynmih ia ki jain ryndia, ka ophis ka District Handloom Officer ka la pynlong da kawei ka prokram kyrpang ba la tip kum ka ‘Looms & Links’ kaba dei ka rynsan ban kyntiew ia ki nongthain jain bad nongthir ksai bad ruh ban pynpaw pyrthei ia ki jain ba ki thain lyngba ka iew ia pyni nam kaba 2 sngi.
Ia kane ka prorkam la wan ban plie da u Principal Secretary ka tnad Textile u Bah F.S Kharkongor kum u kongsan bad u Deputy Commissioner ka Ri Bhoi u Abhilash Baranwal kum u symbut kongsan. Kiwei kiwei kiba la ia don lang ki kynthup ia ka Kong M.R Lywait kum ka Director ka tnad Handloom, ka Kong Monica Lyngdoh Zonal Head ka tnad Handloom, u Bah Daniel Syiem uwei na u Fashion Designer ba paw ha ka jylal, ka Kong D.P Taraing ka District Handloom Officer lem bad kiwei ki ophisar ha ryngkat ki SHG bad ki nongthain jain na ka District bapher bapher.
Kumba la pynpaw da u Principal Secretary ka tnad Textile u Bah F.S Kharkongor, u la ong ba ka jingpynlong ia kane ka prokram ka long shi bynta ban ailad ia ki nongthain jain ba kin pyniaid iew ia ki jain ba ki thain bad ruh ban ka iew ban wan poi ki nongthied ia ki jain ba ki pynmih kaba long shi bynta kamai kajih ia ki nongthain.
U la pynpaw ruh ba ka jylla Meghalaya ka la ioh ruh ia kata ka nam ba ka jain ryndia ba pynmih na kane ka jylla khamtam na Ri Bhoi ka la ioh ia ka GI Tag, ha kaba kane kan pynpaw sha ka pyrthei ia ka jinglong trai jong ki nongthain ba pynmih ia ka jain ryndia.
Shuh shuh, u la ong ruh da kaba pynlong ia kum kine ki prokram kin don ki jingiakren bad ki jingiatai hapdeng ki nongthain jain bad ki Fashion desingner kumno ban dang lah pyniaid iew ia ki jain khamam ka jain ryndia bad ruh da kaba pynlong ia kum kane ka prorkam kan plie lad ba ki nongthain jain kin lah ban pyniaid iew ia ki jain ba ki pynmih ne thain ha ki rukom bapher bapher.
