Shillong, Lber 03: Hadien ka jingsaphriang ki khubor haki rynsan social media pyrshah ïaka BJP Meghalaya naka jingkren u Sunil Deodhar uwei naki nongïalam ka BJP u ba la kren pyrshah ïaki khristan haka jylla, u Bah M Kharkrang nongaiktien ka BJP mynta ka sngi u la pynshai paidbah ba u Sunil Deodhar um don bynta eiei bad ka BJP Meghalaya bad ym don uwei ruh u ba kyrshan ïaka jingkren jong u pyrshah ïaki khristan.
U la ong ruh ba ka niam khristan kala longdoh longsnam ha kane ka jylla lyngba ka jingwan u Thomas Jones u ba la tip ruh kum u kpa ka thoh ka tar, bad wat ki ar ngut ki MLA ka BJP kim ai ka jingkyrshan ïa kane ka jingkren ba khlem nongrim jong utei u nongïalam.
U la ong ruh ba kum ka party ka bud iaki dienjat jong u Myntri Rangbah bad pynrem jur ïa kane ka jingkren u Sunil namar ngi sngewthuh shai ba ka jingkren jong u kala pynmong iaki khristan haka jylla bad katba dang don mangi ngin nym ailad ba ki khristan bad kiwei kiwei ki niam kin shah kren beiñ bad shah niewbein.
