PYNIAP KA KMIE ÏALA U JONG U KHUN BA DANG 8 SNEM HA AGARTALA

Agartala, Jylliew 11: Ha kawei ka jingjia kaba sngew shyrkhei kawei ka longkmie kala pynïap ïala u jong u khun ba dang 8 snem ka rta ha West Jay Nagar, haka jylla Tripura bad katkum ka jingphla sha ki pulit la ong ba katei ka longkmie kala shim ïaka jingim jong u khun namar ba kam lah ban shah ïaka jinglong jong u.
Katei ka jingjia kala jia hynnin ka miet bad katkum ka jingïathuh naki pulit la ong ba u kpa jong utei u khyllung bala tip kyrteng kum u Ram Gowala u la iehnoh ïaka lok bad u khun, bad kumba 2 taiew eiei mynta katei ka kmie bala tip kyrteng kum ka Suprabha Gowala kala sah iingwai ha West Jay Nagar bad u khun bad dei ha kane ka iing wai ba katei ka kmie kala shim syndon ïaka jingim u khun haka por kumba 6 baje eiei.
Naka liang ki pulit jong ka West Tripura Police Station kila register mukotduma haka kyndon aiñ 302 IPC.
Ka Suprabha Gowala kala phla ruh sha ki pulit ba kala teh ïala u jong u khun da u tyllai bad bom da u siej, namar ka jingptnhud palat bad ka ioh por wat ban treikam bad dei na kane ka daw kala shim noh ïaka jingim jong u ban lait naka jingjynjar.
Shuh shuh hadien katei ka jingjia naka liang ki pulit ka West Agartala kila leit sha katei ka jaka bad lap ïa katei ka longkmie ryngkat bad u khun bala ïap bad pdiang ruh ïaka jingpynshitom la ka long ha kano kano ka rukom namar ka kam pyniap jong ka ïala u khun, ki pulit kila kem noh ïa katei ka longkmie bad ka jingtohkit halor katei ka jingjia ka dang ïaid shakhmat.