Nongpoh, Jylliew 25: Da ka jingbitar ki paidbah nongshong shnong ka Lapangap naduh ki kynthei bad ki shynrang mynta ka sngi ki la leit ban pyni bor syndon ïa ka jingwan kyntur pud ka Assam sha ki jaka ba la hap ha u pud u sam ka Meghalaya, ha kaba ki la leit ban thang syndon ïa ka ïing ba la wan shna da ka Assam bad phut lut ïa ki tynrai dieng ba la wang thung da ka Assam.
Kane ka jingbitar ki paidbah nongshong shnong ka Lapangap ba hap ha West Jaintia Hills, ka dei ka jingkynnoh ba ka Assam ka ju pynibor na ka por sha ka por bad ka ju wan kyntur pud shaduh u pud u sam ka Meghalaya ha katei ka shnong khappud hapoh ka Meghalaya bad ka Assam.
Namar ka jingbym lah shah shuh halor ka jingpyni bor bad ka jingtam pud ka Assam, ki paidbah naduh ki longkmie ki longkpa, ki samla ki la mih paidbah ban leit pynpra ïa kawei ka ïing ba la shna da ka Assam bad ki la pynjulor ne phut lut ïa ki tynrai dieng ba la wan thung da ka Assam.
Ha kane ka sngi la mih ruh ka thma ktien hapdeng ki jaid byrniew Karbi bad ki jaid bynriew pnar ba ki Karbi ki la kam ba katei ka jaka ka hap sha Assam bad ki paidbah nongshong shnong ka Lapangap pat ki kam ba ka dei sha ka jylla Meghalaya.
Ban tem halor kane ka jingjia, la wan poi ki pulit ka Assam bad ki Pulit na ka jylla Meghalaya ban pynthanda ïa katei ka jingïakynad kaba la mih hapdeng ki Karbi bad ki paidbah pnar na ka Shnong Lapangap.
Ha kane ka sngi la synran lang bad ai jingkyrshan ruh da ki nongïalam ka HANM Sengkmie ha ka jingïalam u Bah Lamphrang Kharbani ïa ki paidbah ka shnong Lapangap
