Nongpoh, K’lyngkot 05: Kum shibynta ban pynneh pynsah ia ki riti dustur jong ki paid Garo ba la long Khristan kiba shong ba sah ha ki thaiñ Killing ter ter shaduh thaiñ Iongkhuli, ka A-chik Cultural Club Killing, mynta ka sngi ki la pynlong ia kawei ka prokram ba kyrpang na bynta ki paid Garo ha katei ka thain, ha kaba ki la pynlong da ka jingiakop shad, rwai, riam tynrai lem bad kiwei ki jingiakop.
Ha katei ka prokram ba la pynlong da ka ka A-chik Cultural Club Killing, la pynlong ha shnong Bara Killing, Ri Bhoi, ha kaba la sakhi da ka jingdon u Bah Sosthenes Sohtun, Myntri Sorkar jylla, uba dei ruh u MLA/MDC Jirang, ha ryngkat ka jingdon kiwei pat ki riew pawkhmat na ki paid Garo kiba shong ba sah jong katei ka thaiñ.
Lyngba katei ka prokram, la wan ban iashimbynta da baroh ki paid Garo naduh ka thaiñ Killing shaduh ki thaiñ Iongkhuli, ha kaba ki la ïoh ban pyni ia ka rukom shad, rwai bad riam tynrai.
Ha katei ka jingiakop, ka shnong Bara Killing, ka la wan ha ka kyrdan kaba nyngkong, ka shnong Ampher (Assam) ha ka kyrdan ba-ar bad ka shnong Noksikgittim ha ka kyrdan balai.
Haba kren ha katei ka sngi, u Bah Sosthenes Sohtun, kum u Kongsan, u la ai ka jingiaroh ia ki nongialam ka, ka A-chik Cultural Club Killing, kiba la shimkhia ban pynlong ia katei ka Prokram, kaba long kum shibynta ban pynneh pynsah ia ki riti dustur bad kumjuh ruh ban wanrah ia ka jingiatylli hapdeng ki paid Garo kiba shong ba sah ha katei ka thain.
