Nongpoh, Ïaiong 10: U Tourism Officer ka Ri Bhoi District u Bah Ban Nongkynrih mynta ka sngi u la pynshai ba ka jingpom ïa ki Dieng ha u Lumpongdeng badon hapoh ka Pung Umaïam kam dei satia ba la phah leit pom da ka sorkar, hynrei ka dei tang ka jingleit pom tuh ki riew shimet.

Kumban pynkynamw, kane ka jingkynnoh ba la pom ïa ki dieng ha lumpongdeng ka la sapriang ruh wat ha ki rynsan social media lyngba ki dur khih, ha kaba la kynnoh ba la don ka jingpom dieng ha utei u lumpongdeng ha Umiam.

Haba kren ha kane ka sngi, u Tourism Officer ka Ri Bhoi, u Bah Ban Nongkynrih, u la pynshai ba kane ka jingpom ïa ki deing kam dei ba la leh da ka sorkar, hynrei la la leh da ki riew shimet bad hadien ba la ioh jingtip la pyntip ruh sha ki Pulit ka Umiam kiba la ioh ban kem ïa 2 ngut ki briew ba don kti ha kaba pom tuh ïa kitei ki dieng da kaba shim kabu halor kane ka jingïakhih pyrshah ïa ka jingthmu ban tei ïa ka Taj Resort bad Spa ha Umiamg.

Shuh shuh, u la pyntip ruh ba na ka liang ka tnat Tourism na Ri Bhoi ym tang ba ka la ujor sha ka tnad Pulit ka Umiam halor ka jingpom ïa kitei ki dieng bad ka la dep ruh ban pyntip sha ka tnat Forest ba shen na ka liang ka tnad Forest kin sa leit ban jurip lashai ka sngi ban tohkit halor kitei ki jingshah pom dieng ha u Lumpongdeng, u la la bynrap.