Jowai, Jylliew 11:  Da ka jingsngewkhia halor ka jingjyllei ki Trok jong ki bar jylla kiba wan kamai ha ka thain War Jaintia kaba la shu wan kamai khlem ki kot ki sla kiba biang bad ruh kaba la ktah ïa ki trai muluk ki trai jylla ha ka liang ka kamai ka kajih, ka KSU West Jaintia bad FKJGP West Jaintia mynta ka sngi ki la pynher syndon da ka jingthoh sha u Licensing Officer ka JHADC ban dawa ban sangeh ba ai ïa ka trading license sha ki bar jylla.

Kane ka jingshim kine ki 2 seng ban phah syndon da ka jingthoh sha ka JHADC ban dawa pynsangeh ai Trading Licesne sha ki bar jylla, ka dei ruh hadien ba dang hynnin ka sngi ha ka jingleit khynra ïa ki Trok ba wan kamai sha katei ka thain War Jaintia la lap ba bun ki Trok kiba wan kamai ki dei jong ki bar jylla suda.

Haba kren sha ki lad pathai khubor, U Bah Nangkhraw Rani, General Secretary ka FKJGP West Jaintia Hills bad u Leningrad Tariang General Secretary ka KSU West Jaintia Hills, ki la ong ba ki hap ban phah syndon da ka jingtoh sha u Licensing Officer ka JHADC, ka dei namar bala jyllei palat ki bar jylla ba wan kamai kajih sha War Jaintia bad kane ka la pyniap jakpoh ïa bun ki trai muluk ki trai jaka ha ka liang ka ioh kam ioh jam.

Sa pule ruh: Mynsaw 3 Ngut, Julor Phum Ka Dukan Ba Wan Tynrah Kynsan Ka Kali Swift Ha Umdihar

Ki la ong ruh kumba la lap da ki 2 seng, jan baroh ki jaid kam ba dang lah ban trei ki trai muluk ki trai jaka la trei da ki bar jylla bad lada ailad kumne kane kan pyniap jakpoh ia ki trai muluk ki trai jaka.

Shuh shuh, ki la buh ruh ka jingkyrpad ïa ka JHADC kumba ki la dep ban buh jingthoh sha u Licensing Officer ka JHADC, ka phang kaba ki dawa ka long ban sangeh ban ai trading license sha ki bar jylla ba bun na ki kam dang lah ban trei da ki trai jylla bad lada ka JHADC ka leh mynthi halor kane ka jingdawa kitei ki 2 seng ki la maham ban leh da kiwei pat ki lad kiba tyngeh.

Sa peit ruh