Shillong, Risaw 02: Hadien 11 sngi ba ki iakhih ki nonghikai Adhoc hapoh ka shatri Federation of All School Teachers of Meghalaya (FASTOM) mynta ka sngi kila shim iaka rai ban weng noh iaka jingiakhih kaba ki pynlong ha Madan ialehkai phutbol ka Malki.

Kane ka wan hadien ba u Myntri Rangbah ka Jylla u Conrad K Sangma u la khot iakren iaki Nongialam ka FASTOM haka 1 tarik Risaw 2025.

Haba pynbna iaka rai bala weng iaka jingiakhih u Vice President ka FASTOM u Bah Sanborn Jungai ula iathuh ba u Myntri Rangbah ka Jylla ula kular ban pyntreikam noh daka rukom siew tulop thymmai (Basic Pay Scale) iaki nonghikai Adhoc.

U Bah Sanborn ula iathuh baha jingialang bad u Myntri Rangbah, ki nongialam ka FASTOM kila pyni iaka jingeh baki nonghikai Adhoc ki ia kynduh daki phew snem daka ba kdew ruh ba ki nonghikai Adhoc kin nym im lada ka jingsiew (tulop) kaba ki ioh ka neh beit kumjuh bad khlem kiwei pat ki lad jingmyntoi.

U la iathuh ba hakhmat u Myntri Rangbah ki nongialam ka FASTOM kila pynsngew ba ka jingdawa ba kadei beit ban kyntiew kyrdan iaki nonghikai Adhoc shaka Deficit ne Deficit Pattern.

“Naka liang ka Sorkar kala ong to ngin ia klet noh iaka jingdawa kyntiew kyrdan iaki nonghikai Adhoc shaka Deficit ne Deficit Pattern bad la rai ban pyntreikam noh daka rukom siew tulop thymmai (Basic Pay Scale) iaki katkum ka jinglong rangbah (Senior) ki nonghikai haka kam hikai” la ong u Bah Sanborn.

“Ki nonghikai kiba ka hikai 10 snem kin ioh tulop da kumwei, kiba la hikai palat 10 snem kin ioh da kumwei bad kiba la hikai 30 snem kin ioh la ka jong ka Basic Pay” ula bynrap.

U Bah Sanborn ula iathuh ruh ba haka jingiakynduh ia u Myntri Rangbah la rai ruh ban siew Dearness Allowances (DA) iaki nonghikai Adhoc shi sien shi snem.

U la iathuh ruh ba ka Sorkar Jylla kala rai ban siew 16% ka Central Provident Funds kata 8% naka liang ka Sorkar bad 8% yn iarap kynshew daki nonghikai Adhoc haka CPF Account.

“Ka Sorkar Jylla kala rai ruh ban siew iaka Death-cum-Retirement Gratuity (DCRG) bad naka liang ki nonghikai kin sa shong jingialang ban shim iaka rai katno ki nonghikai Adhoc kin iarap kynshew naka bynta ka DCRG” ula ong.

“Namar baka Sorkar Jylla kala rai ban pynhap iaki nonghikai Adhoc hapoh ka rukom siew tulop thymmai lane ka New Pay Structure bad ka Sorkar kala pan por lai bnai ban bishar bniah bad ban pynkhreh iaka rukom siew tulop thymmai bad kala kular ban pynbna iaka rai hashuwa ka lehkmen Christmas namar kata ngi la shim iaka rai ban weng noh iaka jingiakhih” ula bynrap.