Nongpoh Nailur 03: Ki Nongialam ka All Ri Bhoi Government Contractors and Suppliers Association mynta ka sngi ka 3 tarik Nailur ki la leit ban kynduh ia u DIVISIONAL SOIL & WATER CONSERVATION OFFICER RI – BHOI DIVISION ban pynsngew ha kaba iadei bad ka jingpynlait tender naka Tnad Soil & Water Conservation Nongpoh Division, ban shna iaka Water Harvesting Structures ha Ri Bhoi District ba ia katei ka kam dei ban ai bynta sha ki local Contractors kiba na Ri Bhoi District ban pyntrei ia kane kam.
Haba Kren sha ki ladpathai khubor naka liang u Bah Plielad Tiewsoh u Vice President ka All Ri Bhoi Governemnt Contractors and Suppliers Association, u la ong ba na ka liang jong ka Association ka leit ban kynduh ia u Officer katei ka tnad treikam ka dei hadien ba ka tnad Soil & Water Conservation ka la khot tender ia ka projek ba la tip kum ka Water Harvesting Structures, ha kaba ia katei ka kam la shu bhah tang kawei ka package bad kiba bun pat ki Contractor ha kane ka District ki shong khlem kam khlem jam.
U la ong ruh ba lada ka sorkar ka wan rah ia kino kino ki kam pynroi ne ki projek kiba kyntiew ia ka Ri Bhoi District, ka All Ri Bhoi Government Contractors and Suppliers Association kam don kano kano ka jingpyrshah, hynrei kaei kaba ,kum ka Association ka pyrshah ka dei ka jingbhah kam beit tang ia uwei u Contractor khlem da pyrkhat pat ia ki Local Contractor.
Halor kane kane ka jingkynduh ia utei u ophisar ban pynpaw halor katei ka mad ba la buh da ka seng, ka Association ka la rai ruh ban leit kynduh syndon sha u Myntri Rangbah ka jylla u Conrad K. Sangma ban pynsngew ia kane ka mad bad ruh ban ia kren halor shi bun ki jingeh ba ki local contractor ki ia kynduh jingeh ha Ri Bhoi District, u la bynrap.
