Nongpoh, Nailur 14: Kum ka jingburom ba khatduh ia u Dr. D.D Lapang, u MLA barim ka Nongpoh bad uba dei ruh u Myntri rangbah barim ka jylla, uba la khlad noh ha ka 12 tarik u Nailur 2025 ha ka rta kaba 96 snem, ki kynhun bapher bapher naduh ki skul, College, ki seng bhalang, ka Ri Bhoi Dorbar, ki kynhun Balang bad ki riew rangbah na Ri Bhoi mynta ka sngi ki la pynlong ia ka jingleh burom ka jingduwai ba kyrpang na ka bynta ka mynsiem jong u Dr. D.D Lapang ba un ioh ia kata ka jingjahthaid kaba bym jut kut.
Ia kane ka jingleh burom bad ka jingduwa kypang la pynlong ha u Mot Sah jngkynmaw u Dr. D.D Lapang ba la tei sngewbha da ka Young Minds Ri Bhoi ha ka jingialam u Bah Isynei Hinge uba dei mynta u MDC ka Umroi Constituency kaba don ha Ri Bhoi College, ha kaba la lam khmat da u MLA ka Nongpoh u Bah Mayral Born Syiem ha ryngkat ka jingdon lang ka MDC ka Nongpoh ka Kong Rona Khymdeit, u Bah Rangkynsai Makdoh, uwei na u riew rangbah, ka Prinicpal ka Alpha English Higher Secondary School, ka Principal ka Ri Bhoi College ka Dr. Elizabeth Kharkongor lem bad kiwei kiwei ki riew rangbah bad kiba paidbah.
Ha kane ka jingleh burom la pynlong ia ka jingduwai ba kyrpang na ka bynta ka jingjathaid ba bym ju kut u Dr. D.D Lapang bad la buh ruh ia ki syntiew ki skut ha u Mot Sah jingkynmaw kum ka jingleh burom khatduh ia ka met ba dang sah shwa ban leh burom khatduh ha ka 15 tarik u Nailur 2025 ha Nongbah Shillong.
Ha kane ka sngi, la ai jingkren ruh da kitei ki riew rangbah naduh u MLA ka Nongpoh u Bah Mayral Born Syiem, u Bah Rangkynsai Makdoh, ka Kong W.K Blah bad kiwei kiwei, kiba la pynpaw ia ka jingsngewduh nong kaba khraw halor ka jingkhlad noh u Dr. D.D Lapang bad ki la pynpaw ruh ba wat lada u Dr. D.D Lapang um don shuh ha sla ka pyrthei, hynrei kin iai kynmaw ia ki matti bad ki kam nongialam jong u, kiba u la shakri na ka bynta ka Ri Bhoi District.
