Nongpoh, Lber 04: Ki nongri Sniang na ka thain Bhoirymbong area mynta ka sngi ki la pynlong jingialang ha Bhoirymbong ban ia phylliew jingmut ia ki jingeh kiba kum ki nongri jingri ki ia kynduh  bad ki la pan jingiarap ruh na ki nongialam jong ka Hill Farmers Union ban iarap lang ia katei ka jingeh kaba ki ia kynduh kum ki nongri jingri.

Ha kane ka sngi ba la pynlong ia ka jingialang la don lang ruh u general Secretary jong ka Hill Farmers Union Sengkmie u Bah Allfondbirth Kharsyntiew bad u General Secretary jong ka Ribhoi District u bah Pynshai Masharing bad ki para dkhot na bhoirymbong block .

Ki nongri sniang ki la pynsngew ba ka jingshah kniot ha ka dor ban die sniang bad ka jingbymlah shuh ban pynaiaid iew kum ha ki snem bala leit ka la wan rah jingeh ia ki nongrep bad ki nongri jingri kiba shaniah ia ka bai skul ha kane ka kam. Ki la pynpaw ruh ba ka jingbym lah shuh ban siew ia ka ram  na bank ka pynduh thiah ia ki nongri jingri bad ki nongrep.

Ha kane ka sngi la ia kren ruh iaka jingeh ba ki ia kynduh na ka jingrem u bam skop sniang bad ki dawai dashin bad ka jingshitom ban pynheh ia ki sniang, namar ka jingktah ka khlam sniang khari kari ha kaba kane ka la ktah shisha ia ki nongrep ba im jakpoh na ka kam ri jingri.

Kumba la pynpaw da u Bah Alfordbirth Kharsyntiew kum u nongialam ka HFU na ka seng kmie, la ong ba ki nongrep ryngkat ka seng ki la rai ban leit pynsngew ia kitei ki jingeh sha ka sorkar bad khamtam sha u myntri ba de peit ia ka tnad Animal Husbandry and Veterinary ka sorkar jylla.

Shuh shuh, ki la pynsngew ruh ba lada ka sorkar kam iarap ha kum kane ka por ba ki ia kynduh mawsiang, kane kan pynduh mynsiem ia ka ing ka sem ki nongrep bad kan poi ruh ka por ba ki hap pynpep skul ia ki khun na ka daw ka jingshah ktah ha ka ioh ka kot.