Nongpoh, Naitung 22: Kum shi bynta ban pynsngewthuh paidbah halor ka jingdonkam ban shim bynta lang ha ka Special Intensive Revision (SIR) na ka bynta ban pynrung kyrteng ha ka electoral roll, ka Election Branch jong ka Ophis u Deputy Commissioner, Ri-Bhoi District, hynne ka sngi ka la pynlong ïa ka Bike Rally bad Street Play, ba la shim bynta da ki samla pule bad ka Electoral Literacy Club jong ka Ri-Bhoi College, Nongpoh.
Ka jingthmu jong ka SIR ka long ban pynthikna ba baroh ki nongshong shnong kiba la dap 18 snem ka rta bad kiba don hok ban thep vote, kin pynrung kyrteng ïalade ha ka electoral roll. Ka jingïalap ka ai jingpynsngewthuh ruh ba ym dei ban don mano mano kiba shah iehnoh hynrei ba uwei pa uwei u nongshong shnong uba don hok un lah ban pyndonkam ïa ka hok jong u.
Ïa ka prokram la sdang ha phyllaw jong ka Nongpoh Town Shopping Complex, ha kaba la wan ban shim bynta u Bah GLC Mylliem, Assistant Commissioner ka Ri-Bhoi District, ka Kong L. Iawphniaw, nonghikai jong ka Ri-Bhoi College, ki samla pule bad ki nongniah thuk thuk
Hadien ka jingplie paidbah ïa ka prokram, ki nongñiah bike ki la sdang ïa ka rally na Nongpoh Town Shopping Complex, bad ki la ïaid paidbah lyngba ka surok Byrnihat, Nongpoh, Umsning bad Umiam, shuwa ban wanphai biang sha Nongpoh. Ha kajuh ka por, ka Street Play ka la pyni paidbah ïa ka jingdonkam ban pynrung kyrteng ha ka electoral roll bad ban ai mynsiem ïa ki paidbah ban shim bynta ha ka SIR.
